ក្រុមហ៊ុន Xiaomi និង vivo ត្រូវបានគេទទួលស្គាល់ថា ជាក្រុមហ៊ុនដែលមានកំពូលស្មាតហ្វូនបំពាក់ប្រព័ន្ធកាមេរ៉ាខ្លាំង និងល្អបំផុតនាពេលកន្លងមកជាមួយនឹងវត្តមាន Xiaomi Mi 11 Ultra និង vivo X70 Pro+។ ហើយក្នុងឆ្នាំ 2022 នេះវិញ ក្រុមហ៊ុនផលិតស្មាតហ្វូនចិនទាំងពីរនេះ ក៏នឹងធ្វើឲ្យកក្រើកពិភពស្មាតហ្វូនជាថ្មីទៀតជាមួយនឹងវត្តមានកំពូលស្មាតហ្វូនជំនាន់ថ្មីដែលបំពាក់ប្រព័ន្ធកាមេរ៉ាកាន់តែខ្លាំងក្លា និងល្អបំផុតជាងមុន។
បើតាមប្រភពចេញពីប្រទេសចិនតាមរយះគណនី Digital Chat Station បានឲ្យដឹងថា ក្រុមហ៊ុន Xiaomi ត្រៀមបញ្ចេញកំពូលស្មាតហ្វូនជំនាន់ថ្មីរបស់ខ្លួនម៉ាក MIX 5 និង vivo ក៏ត្រៀមបញ្ចេញអាវុធថ្មីរបស់ខ្លួនផងដែរម៉ាក NEX5 ផងដែរ។ ប្រភពដដែលនេះបានបញ្ជាក់បន្ថែមទៀតថា ក្រុមហ៊ុនទាំងពីរនេះក៏នឹងក្លាយជាក្រុមហ៊ុនស្មាតហ្វូន Android ដែលមានស្មាតហ្វូនបំពាក់ប្រព័ន្ធកាមេរ៉ាល្អបំផុតក្នុងឆ្នាំ 2022 ថែមទៀតផងជាមួយកំពូលស្មាតហ្វូនជំនាន់ថ្មីទាំងពីរម៉ូដែលខាងលើនេះ។
ទាំង Xiaomi និង vivo ត្រូវបានគេដឹងថា នឹងប្រើបច្ចេកវិទ្យាសែនស័រថ្មីកម្រិតខ្ពស់ទំហំធំបំផុតសម្រាប់កំពូលស្មាតហ្វូនជំនាន់ថ្មីរបស់ពួកគេជាមួយបច្ចេកវិទ្យា focal-lengths ដែលជំនួយឲ្យការថតរូប និងវីដេអូនៅទីតាំងខ្សោយពន្លឺទទួលបានកម្រិតពន្លឺភ្លឺច្បាស់ខ្ពស់បំផុត ក៏ដូចជាការបង្កើនផលិតភាពកាន់តែប្រសើរទៅលើសមត្ថភាពលែន Ultra-wide, Normal និង Telephoto ផងដែរ។
បើតាមប្រភពព័ត៌មានចចាមអារាមដែលបានចេញផ្សាយថ្មីៗនេះ បានបង្ហើបឲ្យដឹងថា Xiaomi ត្រៀមចាប់ដៃសហការជាមួយក្រុមហ៊ុនផលិតកាមេរ៉ាអាល្លឺម៉ង Leica នៅខណៈដែល vivo នឹងបន្តចាប់ដៃគូសហការជាមួយក្រុមហ៊ុន Zeiss ដដែល។ Digital Chat Station បានបន្ថែមថា Xiaomi MIX5 និង vivo NEX 5 ក៏នឹងភ្ជាប់មកជាមួយបច្ចេកវិទ្យាសាកថ្មល្បឿនលឿនបំផុត និងមានថ្មទំហំធំកាន់ថាមពលប្រើប្រាស់បានយូរថែមទៀតផង។ ទោះជាយ៉ាងណាប្រភពមិនបានបង្ហើបព័ត៌មានលម្អិតទាក់ទងនឹងគុណសម្បត្តិរបស់កំពូលស្មាតហ្វូនជំនាន់ថ្មីរបស់ក្រុមហ៊ុនទាំងពីរនេះនៅឡើយទេ។ ដូច្នេះ មានតែរងចាំការបញ្ចេញព័ត៌មានចេញពីក្រុមហ៊ុន Xiaomi និង vivo ផ្ទាល់ សម្រាប់គុណម្បត្តិនានាដែលនឹងមានមកជាមួយកំពូលស្មាតហ្វូនទាំងពីរស៊េរីដែលនឹងមកដល់ក្នុងពេលឆាប់ៗនេះប៉ុណ្ណោះ៕
