ថ្មីៗនេះ ក្រុមហ៊ុន Google ទើបតែរៀបចំនូវព្រឹត្តិការណ៍ I/O 2022 របស់ខ្លួន។ នៅក្នុងព្រឹត្តិការណ៍នេះ ក្រុមហ៊ុននេះ បានប្រកាសចេញនូវផលិតផលជាច្រើនរួមជាមួយនឹងការប្រកាសនូវកម្មវិធី software ផងដែរ។ ផលិតផលមួយដែលមានការចាប់អារម្មណ៍ខ្លាំងផងដែរនោះគឺ AR Glasses ។
ជាមួយគ្នានេះ ក្រុមហ៊ុនបច្ចេកវិទ្យាយក្សរបស់ Google ក៏បានបំពាក់នូវបច្ចេកវិទ្យា AR នៅលើ Google Glass របស់ខ្លួនផងដែរ។ ប៉ុន្តែផលិតផលនេះ មិនទាន់បង្ហាញខ្លួននៅលើទីផ្សារនោះទេ។ នៅក្នុងព្រឹត្តិការណ៍ I/O នេះ ក្រុមហ៊ុននេះ ក៏បានបង្ហាញនូវ AR Glasses ផងដែរ ដែលនេះ អាចជាជំនាន់ថ្មីរបស់ Google Glass។ ពេលនេះ មានក្រុមហ៊ុនជាច្រើនដូចជា Apple, Meta និង Snap ក៏បាននឹងកំពុងធ្វើការនៅលើផលិតផល AR របស់ខ្លួនផងដែរ។
នៅក្នុងព្រឹត្តិការណ៍នេះ ក្រុមហ៊ុននេះ បានប្រកាសបង្ហាញវត្តមានរបស់ Pixel 6a, Pixel Buds Pro, Pixel Watch និងការបង្ហាញនូវការឌីស្សាញថ្មីរបស់ Pixel 7 series ផងដែរ។ បើមើលទៅលើវីដេអូទម្លាយថ្មីនេះ នៅលើផលិតផលនេះក៏មានការបង្ហាញនូវការបកប្រែជា AI real time ផងដែរ។ បន្ថែមពីនេះទៀតនោះ នាយកប្រតិបត្តិរបស់ក្រុមហ៊ុន Alphabet លោក Sundar Pichai បានបញ្ជាក់ថា សម្រាប់ AR Glasses នេះ ស្ថិតនៅក្នុងដំណាក់កាលនៃគំនូសព្រាង និងស្ថិតនៅក្នុងការធ្វើតេស្តផងដែរ៕