ក្រុមហ៊ុន Google បានប្រកាសចេញកំពូលស្មាតហ្វូន Google Pixel 6 និង Pixel 6 Pro ដែលបំពាក់នូវផ្នែក Hardware ដែលមានសមត្ថភាពខ្លាំងគួរឲ្យចាប់អារម្មណ៍ ប៉ុន្តែ ស្មាតហ្វូនជំនាន់ថ្មីចេញពីក្រុមហ៊ុនរុករកលើប្រព័ន្ធអ៊ីនធ័រណិតជួរមុខគេក្នុងពិភពលោកមួយនេះ កើតមានបញ្ហាមួយដែលធ្វើឲ្យអ្នកគាំទ្រស្មាតហ្វូន Pixel មិនសប្បាយចិត្តនោះគឺទៅលើប្រព័ន្ធស្កែនក្រយ៉ៅម្រាមដៃក្រោមអេក្រង់ដំណើរការមិនប្រក្រតីជូនស្គាល់ជូនមិនស្គាល់ ឬក៏ដំណើរការយឺតជាដើម ទោះបីជា Google បានបញ្ចេញកំណែប្រែ Update Software ដើម្បីដោះស្រាយបញ្ហានេះក្តី ក៏នៅតែមិនទទួលបានផលល្អដូចការំពឹងទុកឡើយ។
យ៉ាងណាមិញបើតាមប្រភពព័ត៌មានបាននិយាយថា Google អាចនឹងបញ្ចេញស្មាតហ្វូនជំនាន់ថ្មីរបស់ Pixel 6 Series គឺ Pixel 6a ដើម្បីលោងចិត្តអ្នកប្រើប្រាស់របស់ខ្លួនវិញ។ ប្រភពបានបន្តថា ចំពោះ Pixel 6a ជំនាន់ថ្មី គឺនឹងបំពាក់នូវប្រព័ន្ធសែនស័រស្កែនក្រយ៉ៅម្រាមដៃក្រោមអេក្រង់ថ្មីដែលធ្វើការបានល្អប្រសើរជាងនៅលើជំនាន់មុន ដោយមិនប្រើសែនស័រ In-Display ដែលបានប្រើនៅលើ Pixel 6 Series នោះទេ នេះបើតាមការបញ្ជាក់ពីក្រុមហ៊ុន Google ផ្ទាល់។
យោងទៅលើប្រភពព័ត៌មានបានឲ្យដឹងថា Google ទំនងជានឹងប្រកាសចេញ Pixel 6a នៅថ្ងៃទី 28 ក្នុងខែកក្តដា ឆ្នាំ 2022 ខាងមុខនេះ។ស្មាតហ្វូន Google Pixel 6a ត្រូវបានគេដឹងថា គឺមានការឌីស្សាញរូបរាងខាងក្រៅស្រដៀងគ្នានឹងជំនាន់មុនរបស់វា។ ស្មាតហ្វូនជំនាន់ថ្មីនេះនឹងមានអេក្រង់ទំហំ 6.1 អ៊ីញជាមួយល្បឿន refresh rate 60Hz និងការពារដោយកញ្ចក់ Corning Gorilla Class 3។
Pixel 6a នឹងបំពាក់ឈីប Tensor ដូច Pixel 6 និង 6 Pro ដែរ និងមានរ៉េមទំហំ 6GB ជាមួយអង្គផ្ទុកទិន្នន័យទំហំ 128GB។ ហើយសម្រាប់ប្រព័ន្ធកាមេរ៉ាវិញ នឹងបំពាក់សែនស័រ Sony IMX363 ទំហំ 12.2MP រួមនិងសែនស័រ Ultra-wide ទំហំ 12MP។ ចំនែកកាមេរ៉ាសែលហ្វីអាចនឹងមានទំហំ 8MP។ ស្មាតហ្វូនជំនាន់ថ្មីនេះ ក៏នឹងមានថ្មទំហំ 4400mAh គាំទ្របច្ចេកវិទ្យាសាកភ្លើងកំលាំង 25W Fast Charging។ Google Pixel 6a អាចនឹងមានជម្រើសតែមួយម៉ូដែលប៉ុណ្ណោះជាមួយជម្រើសពណ៌ចំនួន 3 ដូចរៀមច្បងរបស់វាដែរ គឺខ្មៅ ស និងបៃតងស្រាល។ ចំពោះតម្លៃវិញ ត្រូវបានគេប៉ាន់ប្រមាណថាអាចនឹងមានតម្លៃប្រហែល $449 ហើយអាចនឹងបើកឲ្យធ្វើការបញ្ជាទិញមុនបានចាប់ពីថ្ងៃទី 21 ខែកក្តដាទៅ៕