realme Narzo 50 5G ស្មាតហ្វូនជំនាន់ថ្មីនឹងមកដល់ក្នុងខែឧសភានេះហើយ។ ទន្ទឹមនឹងនេះស្មាតហ្វូនជំនាន់ថ្មីនេះ ក៏បានឆ្លងកាត់វិញ្ញាបនប័ត្របញ្ជាក់ការផលិតពីស្ថាប័នពាក់ព័ន្ធមួយចំនួនរួចរាល់ហើយដូចជាស្ថាប័ន NBTC, EEC និង Bluetooth SIG ជាដើម។
បើតាមការចុះផ្សាយដោយបណ្តាញសារព័ត៌មាន MySmartPrice បានចុះផ្សាយថា realme Narzo 50 5G ត្រូវបានចុះបញ្ចីរបស់ស្ថាប័ន EEC និង Bluetooth SIG ជាមួយនឹងលេខកូដសំគាល់ម៉ូដែលថា RMX3572 នៅខណៈដែរនៅលើបញ្ចីរបស់ NBTC បានបញ្ជាក់ផ្លូវការណ៍ថា ជាម៉ូដែល Narzo 50 5G។ យ៉ាងណាមិញនៅលើបញ្ចីរបស់ស្ថាប័នទាំងបីខាងលើមិនបានបញ្ជាក់ពីគុណសម្បត្តិរបស់ស្មាតហ្វូនជំនាន់ថ្មីនេះនោះទេ។ ដោយឡែកបើតាមប្រភពព័ត៌មានចចាមអារាមដែលបានចេញផ្សាយថ្មីៗនេះ បានឲ្យដឹងថា realme Narzo 50 5G នឹងបំពាក់អេក្រង់ទំហំ 6.6 អ៊ីញ OLED Display គាំទ្រកម្រិតបង្ហាញ FHD+ ជាមួយល្បឿន refresh rate 90Hz។
ស្មាតហ្វូនជំនាន់ថ្មីនេះអាចនឹងដំឡើងមកជាមួយបន្ទះឈីប MediaTek Deminsity 810 SoC ជាមួយអង្គក្រាហ្វិច Mali-G57។ ប៉ុន្តែប្រភពមិនបានបញ្ជាក់ពីទំហំរ៉េម និងអង្គផ្ទុកក្នុងម៉ាស៊ីននោះទេ។ សម្រាប់ប្រព័ន្ធកាមេរ៉ាថតរូបវិញ Narzo 50 5G អាចនឹងមានកាមេរ៉ាក្រោយពីរគ្រាប់ដោយប្រើសែនស័រមេទំហំ 13MP និងមានកាមេរ៉ាសែលហ្វីទំហំ 8MP។ ចំពោះថ្មអាចនឹងមានទំហំ 5,000mAh និងគាំទ្រកំលាំងសាកភ្លើងល្បឿនលឿន 33W។ realme នឹងបញ្ចេញស្មាតហ្វូនម៉ាក Narzo 50 5G ផ្លូវការណ៍នៅថ្ងៃទី 18 ខែឧសភា ឆ្នាំ 2022 សប្តាហ៍ក្រោយនេះ៕
