បើតាមប្រភពរបាយការណ៍ចេញពីប្រទេសកូរ៉េខាងត្បូងបាននិយាយថា ផ្នែកសំខាន់មួយក្នុងចំនោមផ្នែកសំខាន់ៗមួយចំនួនទៀតដែលត្រូវបានធ្វើការ Upgrades នៅលើគ្រួសារស្មាតហ្វូន iPhone 14 Series គឺកាមេរ៉ាសែលហ្វី។ ក្រុមហ៊ុន Apple ត្រូវបានគេមើលឃើញថា បាននឹងកំពុងស្វែករកការទិញនូវសែនស័រកាមេរ៉ាសែលហ្វីដែលមានគុណភាពខ្ពស់បំផុតសម្រាប់បំពាក់នៅលើ iPhone 14 Series។ ដែលតាមដឹងក្រុមហ៊ុនបិតាបច្ចេកវិទ្យារបស់អាមេរិកនេះបាននឹងកំពុងស្វែងរកការផ្គត់ផ្គង់សែនស័រសែលហ្វីដែលអភិវឌ្ឍន៍ដោយក្រុមហ៊ុន LG Innotek ក៏ដូចជាក្រុមហ៊ុន Sharp ផងដែរ។
ប្រសិនបើព័ត៌មានខាងលើនេះ គឺការពិតមែននោះ បញ្ជាក់ថា នេះជាលើដំបូងក្នុងប្រវត្តិសាស្ត្រសម្រាប់សែនស័រកាមេរ៉ាសែលហ្វីរបស់ iPhone ដែលត្រូវបានផ្គត់ផ្គង់ដោយក្រុមហ៊ុនបច្ចេកវិទ្យារបស់ប្រទេសកូរ៉េខាងត្បូង។ បន្ថែមពីនេះ Apple ត្រូវបានគេរាយការណ៍ថាបាននឹងកំពុងធ្វើការរចនាជាមួយនឹងកាមេរ៉ាសែលហ្វីដែលមានគុណភាពខ្ពស់បំផុតសម្រាប់ប្រើនៅលើ iPhone ជំនាន់ថ្មីឆ្នាំ 2022 របស់ខ្លួន។ ដំបូងឡើងប្រព័ន្ធកាមេរ៉ាសែលហ្វីដែលផលិតដោយក្រុមហ៊ុន LG Innotek ត្រូវបានគេសន្មត់ថានឹងចាប់ផ្តើមប្រើនៅលើ iPhone 15 Series ដែលចេញនៅឆ្នាំ 2023 ឯណោះទេ ប៉ុន្តែ Apple បានរំកឹលកាលវិភាគរបស់ខ្លួនមកមុខវិញ ដូច្នេះ សែនស័រសែនហ្វីថ្មីដំបូងរបស់ LG Innotek ច្បាស់ណាស់គឺចាប់ផ្តើមប្រើក្នុងឆ្នាំនេះនៅលើគ្រួសារ iPhone 14 Series។
សម្រាប់ហេតុផលដែល Apple សម្រេចចិត្តរកជំនួយក្នុងការផ្គត់ផ្គង់សែនស័រកាមេរ៉ាសម្រាប់ iPhone 14 Series ដោយសារតែសែនស័រកាមេរ៉ាសែលហ្វីដែលផលិតដោយក្រុមហ៊ុនចិនដែលមិនត្រូវបានប្រភពបញ្ចេញឈ្មោះកើតមានបញ្ហានៅក្នុងដំណាក់កាលធ្វើតេស្តសាកល្បង។ ហើយសម្រាប់ការផ្លាស់ប្តូរមកប្រើនូវសែនស័រកាមេរ៉ាថ្មីគុណភាពខ្ពស់នេះត្រូវបានគេដឹងថា នឹងធ្វើឲ្យកាមេរ៉ាសែលហ្វីរបស់ iPhone 14 Series កាន់តែមានសមត្ថភាពខ្លាំង រួមទាំងមានការ Upgrades នៅលើមុខងារសំខាន់ៗមួយចំនួនក្នុងនោះក៏មានមុខងារ autofocus ផងដែរ។ ហើយជាមួយនឹងកាមេរ៉ា upgrades ប្រព័ន្ធកាមេរ៉ាសែលហ្វីនៅលើ iPhone 14 Series ក៏ធ្វើឲ្យតម្លៃរបស់សែនស័រសែលហ្វីថ្លៃជាងសែនស័រដែលប្រើនៅលើ iPhone 13 Series បច្ចុប្បន្នដល់ទៅ 3 ដងឯណោះ។ ដូច្នេះ តម្លៃរបស់ iPhone 14 Series ដែលចេញឆ្នាំនេះ អាចនឹងមានតម្លៃកាន់តែថ្លៃជាងជំនាន់មុនរបស់ពួកវា៕