ក្រុមហ៊ុន realme បានប្រកាសបញ្ជាក់ផ្លូវការណ៍នៅថ្ងៃប្រកាសចេញ realme Pad X នៅប្រទេសចិន គឺនៅថ្ងៃទី 26 ខែឧសភា ឆ្នាំ 2022។ realme Pad X នឹងក្លាយជា Tablet ដំបូងចេញពីម៉ាកផលិតមួយនេះដែលប្រកាសចេញនៅក្នុងប្រទេសចិនដែលជាស្រុកកំណើតរបស់ខ្លួនផ្ទាល់។ ហើយកាលពីសប្តាហ៍មុននេះ realme បានធ្វើការបង្ហាញចេញពីឌីស្សាញរបស់ឧបករណ៍ស៊េរីថ្មីជាផ្លូវការណ៍ហើយ។ ហើយស្របពេលជាមួយគ្នានេះក៏មានការបង្ហាញចេញពីគុណសម្បត្តិមួយចំនួនផងដែរដូចជា ទំហំអេក្រង់ ថ្ម និងផ្នែកជាច្រើនទៀត។
បើយោងតាមការបង្ហាញដោយគណនី Weibo របស់ realme ឈ្មោះថា Xu Chi Chase បានឲ្យដឹងថា realme Pad X គឺមានថ្មទំហំធំដល់ទៅ 8,340mAh និងគាំទ្របច្ចេកវិទ្យាសាកភ្លើងកំលាំង 33W Fast Charging។ ហើយបើតាមការបញ្ជាក់ realme Pad X នឹងមានកាមេរ៉ាខាងមុខស្ថិតនៅចំកណ្តាលដូចគ្នានឹង iPad ជំនាន់ថ្មីរបស់ Apple ផងដែរ។ realme Pad X នឹងមានអេក្រង់ទំហំ 11 អ៊ីញ និងជាប្រភេទបន្ទះអេក្រង់ LCD កម្រិត 2K ព្រមទាំងគាំទ្រនៅមុខងារ Sunlight mode និងមុខងារកាត់បន្ថយកម្រិតពន្លឺពណ៌ខៀវ Blue light filter ថែមទៀតផង។
បន្ថែមពីនេះ realme Pad X ក៏នឹងដំឡើងមកជាមួយប្រព័ន្ធ Speaker បំពងសំឡេង 4 គ្រាប់ និងគាំទ្របច្ចេកវិទ្យាសំឡេងកម្រិត Dolby Atmos ថែមទៀតផង រួមនឹងមានរន្ធសម្រាប់ដាក់បន្ថែមទំហំផ្ទុកជាប្រភេទ microSD ផងដែរ។ ទោះជាយ៉ាងណា សម្រាប់បន្ទះឈីបដែលនឹងត្រូវប្រើនៅលើ realme Pad X មិនទាន់ត្រូវបានក្រុមហ៊ុនបញ្ជាក់នៅឡើយទេ៕