នៅថ្ងៃនេះក្រុមហ៊ុន Xiaomi បានប្រកាសផ្លូវការណ៍ពីការចាប់ដៃសហការគ្នាជាមួយក្រុមហ៊ុនផលិតម៉ូឌុលកាមេរ៉ា ដ៏ល្បីរបស់អាល្លឺម៉ង់ម៉ាក Leica នៅក្រោមកិច្ចការអភិវឌ្ឍន៍ផលិតស្មាតហ្វូន Flagship ដែលត្រៀមមកដល់ផ្លូវ ការណ៍នាប៉ុន្មានខែខាងមុខទៀតនេះ។ ក្រុមហ៊ុន Xiaomi បានប្រកាសផ្លូវការណ៍ថា “Long-term strategic Cooperation” ឬ “កិច្ចសហការណ៍ជាយុទ្ធសាស្ត្ររយះពេលយូរ” ជាមួយក្រុមហ៊ុន Leica និងបានប្រកាសបញ្ជាក់ ទៀតថា កិច្ចសហការជាដៃគូរបស់ពួកគេក្នុងការអភិវឌ្ឍន៍ផលិតស្មាតហ្វូនកម្រិត Flagship នឹងត្រូវប្រកាស ចេញនៅក្នុងខែកក្តដាឆ្នាំនេះ។
ការចាប់ដៃសហការលើកនេះ គឺជាក្រុមហ៊ុនទីបួនដែល Leica បានសហការជាមួយសម្រាប់ការផ្គត់ផ្គង់នូវសែន ស័រកាមេរ៉ាទូរស័ព្ទបន្ទាប់ពី Sharp, Huawei, និង Panasonic។ ទោះជាយ៉ាងណាក៏ដោយ Xiaomi មិនបានបង្ហាញព័ត៌មានណាមួយពាក់ព័ន្ធនឹងស្មាតហ្វូនដែលនឹងមកដល់នាពេលខាងមុខនោះទេ។ សម្រាប់ស្មាតហ្វូនជំនាន់ថ្មីដែលបំពាក់កាមេរ៉ា Leica ត្រៀមបង្ហាញវត្តមាននាពេលខាងមុខនេះត្រូវបានគេដឹងថា នឹងបំពាក់កំពូលឈីបជំនាន់ថ្មី Snapdragon 8+ Gen 1 ដែលប្រកាសចេញនាពេលថ្មីៗនេះ។ លោក Lei Jun នាយកប្រតិបត្តិនៃក្រុមហ៊ុន Xiaomi បាននិយាយថា ភាពជាដៃគូនឹងផ្តល់នូវការជំរុញយ៉ាងខ្លាំងដល់យុទ្ធសាស្ត្រការថតរូបភាពចេញពីស្មាតហ្វូន ប៉ុន្តែ លោកមិនបានមិនបង្ហាញព័ត៌មានលម្អិតនោះទេ។
Xiaomi ហាក់បីដូចជាកំពុងដើរតាមគន្លងរបស់ក្រុមហ៊ុនផលិតស្មាតហ្វូនម៉ាកយីហោរបស់ប្រទេសចិនផ្សេងទៀត ដើម្បីផ្តល់ជូននូវលក្ខណៈពិសេសប្លែកនៅលើស្មាតហ្វូន ឬស្មាតហ្វូនលំដាប់ខ្ពស់របស់ខ្លួន ដើម្បីធ្វើឱ្យកាន់តែមានភាពលេចធ្លោរខ្លាំងបន្ថែមទៀតនៅក្នុងចំណោមឧបករណ៍ពីម៉ាកយីហោផ្សេងៗ។ សម្រាប់និន្នាការនេះវាត្រូវបានចាប់ផ្តើមឡើងដំបូងពីក្រុមហ៊ុន Huawei នៅក្នុងឆ្នាំ 2016 ដោយបានចាប់ដៃគូជាមួយ Leica ក្នុងការបំពាក់នូវសែនស័រកាមេរ៉ាស្មាតហ្វូនថ្នាក់កំពូលរបស់ខ្លួន។
ជាមួយគ្នានេះ OnePlus និង OPPO ក៏បានចាប់ដៃគូជាមួយក្រុមហ៊ុនផលិតសែនស័រកាមេរ៉ាល្បីឈ្មោះ Hasselblad ផងដែរ នៅខណៈដែល vivo បានចាប់ដៃគូជាមួយក្រុមហ៊ុន Zeiss។ សម្រាប់កំពូលស្មាតហ្វូនជំនាន់ថ្មីដំបូងរបស់ Xiaomi ដែលអាចនឹងបំពាក់សែនស័រកាមេរ៉ា Leica គឺជា Xiaomi 12 Ultra ដែលនឹងបង្ហាញវត្តមានឆាប់ៗនាពេលខាងមុខនេះ ហើយស្មាតហ្វូនកំពូលមួយនេះអាចជាស្មាតហ្វូនដំបូងគេដែលបំពាក់កំពូលឈីប Snapdragon 8+ Gen 1 ផងដែរ៕