Motorola Razr 3 នឹងក្លាយជាស្មាតហ្វូនអេក្រង់បត់ដំបូងគេដែលប្រើបន្ទះឈីបនាគរាជជំនាន់ថ្មី Snapdragon 8+ Gen 1 នេះបើតាមការបង្ហើបនៅលើគណនី Weibo ផ្លូវការណ៍របស់ក្រុមហ៊ុនផ្ទាល់។ លោក Shen Jin ដែលជានាយកចាត់ការទូទៅរបស់ Motorola បានធ្វើការចែករំលែកនូវរូបភាព Posterថ្មីមួយនៅលើគណនី Weibo ដែលមិនត្រឹមតែបង្ហើបតម្រុយពីការមកដល់របស់ស្មាតហ្វូនអេក្រង់បត់ Motorola Razr 3 ប៉ុន្តែ ថែមទាំងបង្ហាញថា ស្មាតហ្វូនជំនាន់ថ្មីនេះក៏នឹងដំណើរជាមួយកំពូលឈីបជំនាន់ថ្មី Snapdragon 8+ Gen 1 ដែល Qualcomm ទើបប្រកាសចេញថ្មីៗនេះផងដែរ។
ទោះជាយ៉ាងណានៅលើផ្ទាំង Poster មិនបានបញ្ជាក់ពីវត្តមាន Motorola Razr 3 នោះទេ ប៉ុន្តែយើងបានឃើញពីការឌីស្សាញរបស់ស្មាតហ្វូនអេក្រង់បត់ជំនាន់ថ្មីនេះ។ បន្ទះឈីបជំនាន់ថ្មី Snapdragon នឹងធ្វើឲ្យស្មាតហ្វូនអេក្រង់បត់ Motorola Razr 3 មានប្រសិទ្ធិភាពខ្ពស់សម្រាប់ការប្រើការជាងស្មាតហ្វូនអេក្រង់បត់ផ្សេង។ បន្ទះឈីប Snapdragon 8+ Gen 1 បានផលិតឡើងតាមស្តង់ដារ 4nm របស់ TSMC ដែលមានល្បឿន CPU និង GPU ខ្លាំងជាងជំនាន់ Snapdragon 8 Gen 1 ប្រមាណ 10% និងសន្សំសំចៃថាមពលប្រើប្រាស់ប្រសើរជាងមុនប្រមាណ 30%។
បើតាមប្រភពព័ត៌មានបែកធ្លាយកន្លងមកបានបង្ហាញថា Motorola Razr 3 នឹងបំពាក់អេក្រង់បត់បែប Clamshell ទំហំ 6.7 អ៊ីញ និងអេក្រង់ខាងក្រៅទំហំ 3 អ៊ីញ។ ហើយសម្រាប់អេក្រង់បត់ខាងក្នុង គឺនឹងមានល្បឿន refresh rate 120Hz និងគាំទ្រកម្រិតបង្ហាញចេញ Full-HD+។ ជាងនេះទៅទៀត ស្មាតហ្វូនអេក្រង់បត់ជំនាន់ថ្មីនេះ នឹងមានកាមេរ៉ាសែលហ្វីទំហំ 32MP និងកាមេរ៉ាក្រោយទំហំ 50MP Main Sensor រួមជាមួយ Ultra-wide ទំហំ 13MP។ បើតាមប្រភពព័ត៌មានចុងក្រោយ Motorola អាចនឹងប្រកាសចេញស្មាតហ្វូនអេក្រង់បត់ជំនាន់ថ្មី Razr 3 នៅសប្តាហ៍ចុងក្រោយក្នុងខែកក្តដា ឬដើមខែសីហានៅក្នុងប្រទេសចិន។ ហើយស្មាតហ្វូនជំនាន់ថ្មីនេះ អាចនឹងចេញលក់លើទីផ្សារសកលនៅក្នុងខែសីហា ឆ្នាំ 2022៕