ថ្មីៗនេះ ក្រុមហ៊ុន Motorola នៅក្នុងប្រទេសចិន ទើបតែបញ្ជាក់អំពីស្មាតហ្វូនដែលមានកាមេរ៉ា 200MP ដែលគ្រោងនឹងបង្ហាញខ្លួននៅក្នុងខែកក្កដាខាងមុខនេះ។ ពាក្យចចាមអារ៉ាមនេះ គឺធ្លាប់បានបញ្ជាក់ពីស្មាតហ្វូន Motorola Frontier ដែលមានតាំងពីឆ្នាំមុនមកម្ល៉េះ។ នៅក្នុងការទម្លាយថ្មីនេះ បានបង្ហាញអំពីកាមេរ៉ាទំហំ 200MP ដែលនឹងផ្តល់នូវបទពិសោធន៍ដ៏អស្ចារ្យបំផុត។
ផ្អែកទៅលើពាក្យចចាមអារ៉ាមជាច្រើននាពេលថ្មីៗនេះ បានអោយដឹងថា ក្រុមហ៊ុន Motorola ត្រូវគេរំពឹងថា នឹងប្រើប្រាស់នូវសេនស័រ 200MP ISOCELL HP1 របស់ក្រុមហ៊ុន Samsung។ សម្រាប់សេនស័រនេះអាចមានទំហំ 12.5MP ឬទំហំ50MP និងមានសមត្ថភាពអាចធ្វើការថតវីដេអូកម្រិត 8K ជាមួយនឹងកម្រិត 30fps។ ថ្មីៗនេះ ក្រុមហ៊ុន Motorola ក៏បានបញ្ជាក់ថា ខ្លួនកំពុងតែធ្វើការនៅលើស្មាតហ្វូនដែលមានបន្ទះឈីប Snapdragon 8+ Gen 1 ដែលនេះ អាចជាស្មាតហ្វូនដែលមានកាមេរ៉ា 200MP។
សូមជំរាបថា ស្មាតហ្វូន Motorola Frontier ធ្លាប់បានការទម្លាយថា នឹងមានអេក្រង់ 6.67-inch pOLED ជាមួយនឹងកម្រិតអេក្រង់ 144Hz refresh rate ហើយនិងមានកាមេរ៉ាមុខទំហំ 60MP។ ស្មាតហ្វូនជំនាន់ថ្មីនេះ ក៏អាចនឹងមានរ៉េមទំហំ 8GB-12GB និងមានម៉េមូរីទំហំ 128GB-256GB ផងដែរ។ ស្មាតហ្វូនថ្មីនេះ មានថាមពលថ្មទំហំ 4500mAh និងមានការគាំទ្រដោយបច្ចេកវិទ្យាសាកថ្មលឿនកម្លាំង 125W wired charging និង wireless charging ថែមទៀតផង៕