កាលពីដើមឆ្នាំនេះ BOE ដែលជាក្រុមហ៊ុនផលិតអេក្រង់ដ៏ធំបំផុតរបស់ប្រទេសចិន បានចាប់ដៃគ្នាជាមួយក្រុមហ៊ុន Apple នៅក្នុងការផ្គត់ផ្គង់នូវអេក្រេង់ OLED សម្រាប់បំពាក់នៅលើ iPhone 14 Series ដែលក្រុមហ៊ុនអាមេរិកាំងមួយនេះ គ្រោងនឹងប្រកាសចេញជាផ្លូវការនៅខែកញ្ញាខាងមុខនេះ។ ប៉ុន្តែរឿងនេះ ក៏ត្រូវបានពន្យាពេលទៅវិញ ដោយសារតែក្រុមហ៊ុន BOE បានធ្វើការផ្លាស់ប្តូរនូវខ្សែរសៀក្វីរបស់អេក្រង់ដែលប្រើសម្រាប់ iPhone 13។ នៅពេលនេះយោងតាមរបាយការណ៌ថ្មីបាននិយាយថា Apple កំពុងវាយតម្លៃគំរូអេក្រង់របស់ BOE សារជាថ្មីម្តងទៀត ហើយលឺដំណឹងថា អាចនឹងធ្វើការញ្ជាទិញទ្រង់ទ្រាយធំថែមទៀតផង។
បើតាមការបញ្ជាក់នៅក្នុងរបាយការណ៌របស់សារព័ត៌មាន Elec របស់កូរ៉េខាងត្បូង ចេញផ្សាយនៅសប្តាហ៌នេះ គឺបាននិយាយថា ក្រុមហ៊ុន Apple នឹងធ្វើការវាយតម្លៃទៅលើគំរូអេក្រង់របស់ក្រុមហ៊ុន BOE ម្តងទៀត ប្រសិនបើអ្វីៗមិនមានបញ្ហាទេនោះ ក្រុមហ៊ុននេះ នឹងធ្វើការបញ្ជាទិញអេក្រង់ OLED សម្រាប់ប្រើប្រាស់នៅលើ iPhone 14 Series មានចំនូនកាន់តែច្រើនជាងមុនថែមទៀត។
ក្រុមហ៊ុនផលិតអេក្រង់របស់ចិននេះ ត្រូវរង់ចាំរយៈពេលមួយខែនៅក្នុងការសម្រេចថា ទទួលបាន ឬមិនទទួលបាននូវការបញ្ជាក់ពីក្រុមហ៊ុន Apple ហើយប្រសិនបើក្រុមហ៊ុនអាមេរិកាំងនេះព្រមនោះ ក្រុមហ៊ុន BOE នឹងអាចចាប់ផ្តើមការផលិតទ្រង់ទ្រាយធំទៅលើអេក្រង់នេះ ចាប់ពីខែកក្កដា និងខែសីហាខាងមុខនេះហើយ។ របាយការណ៌ដដែលនេះបញ្ជាក់ថា ក្រុមហ៊ុន BOE អាចនឹងទទួលបាននូវការបញ្ជាទិញចំនួន 5 លាបន្ទះ។
