កាលពីខែតុលាឆ្នាំមុននេះ ក្រុមហ៊ុន Samsung បានប្រកាសចេញចេញនូវម៉ូដែលពិសេស Bespoke Edition សម្រាប់ស្មាតហ្វូនបត់បាន Galaxy Z Flip3 របស់ខ្លួន ជាមួយនិងជម្រើសពណ៌ជាច្រើនដល់ទៅ 49 ពណ៌ឯណោះ។ យោងតាមព័ត៌មានចចាមអារ៉ាមនៅថ្ងៃនេះ មានព័ត៌មានថ្មីមួយនិយាយថា កម្មវិធីដូចគ្នានេះ ក៏នឹងមានការប្រើប្រាស់នៅលើស្មាតហ្វូនបត់បានជំនាន់ថ្មី Galaxy Z Flip4 ផងដែរ ដោយម៉ូដែលនេះ អាចនឹងមានជម្រើសពណ៌ច្រើនជាងមុនសម្រាប់វាយលុកទីផ្សារថ្មីៗថែមទៀតផង។
បើមើលទៅម៉ូដែលមុន Z Flip3 គឺមានការឌីស្សាញស៊ុមព័ទ្ធជុំវិញជាមួយពណ៌មួយឬក៏ពីរ ខណៈដែលខាងមុខ និងខាងក្រោយមានចំនួនពណ៌ដល់ទៅ 5។ សម្រាប់ម៉ូដែលថ្មី Z Flip4 វិញ Bespoke Studio នឹងផ្តល់អោយប្រហែលគ្នានេះដែរ ប៉ុន្តែមានជម្រើសកាន់តែច្រើនជាងមុន។ មកដល់ពេលនេះ ក្រុមហ៊ុន Samsung បានផ្តល់នូវសេវាកម្ម Bespoke Customization នេះ មាននៅក្នុងសហរដ្ឋអាមេរិក និងកាណាដា ចក្រភពអង់គ្លេស បារាំង កូរ៉ខាងត្បូង និងអូស្ត្រាលី ហើយឆ្នាំនេះ ក្រុមហ៊ុននេះ គ្រោងនឹងបន្ថែមទីផ្សារមួយចំនួនទៀតដូចជា អឺរ៉ុប និងអាស៊ី ផងដែរ។
ទាក់ទងនឹងម៉ូដែលពិសេសនេះ ក្រុមហ៊ុន Samsung ក៏នឹងមានផ្តល់នូវ Bespoke customization សម្រាប់នាឡិកា Galaxy Watch4 និង Watch4 Classic ផងដែរ ដែលពិតជាពិសេសខ្លាំងមែនទែន។ ជាមួយគ្នានេះសម្រាប់ការមកដល់របស់នាឡិកា Galaxy Watch5 ក៏នឹងស្ថិតនៅក្នុងគម្រោងរបស់ Bespoke ដែលនឹងមានលក់នៅលើទីផ្សារថ្មីៗផងដែរ។ ស្មាតហ្វូន Galaxy Z Flip4 និង Z Fold4 រួមជាមួយនិងនាឡិកា Galaxy Watch5 ត្រូវបានគេបញ្ជាក់ថា នឹងបង្ហាញវត្តមានៅលើទីផ្សារនៅថ្ងៃទី 10 ខែសីហាខាងមុខនេះហើយសម្រាប់ Bespoke Studio គឺនឹងអាចរកបានចាប់ពីថ្ងៃដំបូង ឬក៏ថ្ងៃប្រកាសរួចរាល់។
