មួយរយៈចុងក្រោយនេះ ក្រុមហ៊ុន Samsung ត្រូវបានគេមើលឃើញថា បានធ្វើការផ្លាស់ប្តូរនូវយុទ្ធសាស្ត្រជាច្រើននៅក្នុងការជំរុញអោយស្មាតហ្វូនជំនាន់ថ្មីៗរបស់ខ្លួនកាន់តែមានការពេញនិយម និងជឿជាក់កាន់ខ្លាំងសម្រាប់អ្នកប្រើប្រាស់។ សម្រាប់ឆ្នាំនេះ Galaxy S23 Series គឺជាម៉ូដែមួយដែលនឹងចូលមកប្រឡូកក្នុងទីផ្សារស្របពលថ្មីៗនេះ មានរបាយការណ៌ជាច្រើនបាននិយាយថា ក្រុមហ៊ុន Samsung គ្រោងនឹងអាប់ដែតកាមេរ៉ារបស់ស្មាតហ្វូននេះ ជាមួយនិងទំហំដល់ទៅ 200MP ISOCELL HP1 sensor សម្រាប់ម៉ូដែល Galaxy S23 Ultra។
បន្ថែមពីនេះ ក្រុមហ៊ុន Samsung ក៏នឹងមានការផ្លាស់ប្តូរនូវកាមេរ៉ាមុខរបស់ម៉ូដែល Galaxy S23 និង Galaxy S23+ ផងដែរ។ បើតាមប្រភពថ្មីមួយដែលដកស្រង់ចេញពី GalaxyClub តាមរយៈ SamMobile នោះ គឺបានសសេរថា ស្មាតហ្វូន Galaxy S23 និង Galaxy S23+ ទំនងជានឹងប្រើប្រាស់នូវកាមេរ៉ាមុខទំហំ 12MP ខណៈដែលម៉ូដែលមុន Galaxy S22 និង Galaxy S22+ គឺប្រើប្រាស់ត្រឹមតែ 10MP ប៉ុណ្ណោះ។ គួរបញ្ជាក់ថា ក្រុមហ៊ុន Samsung ជាធម្មតាតែងតែប្រើប្រាស់នូវកាមេរ៉ាមុខធំសម្រាប់ម៉ូដែល Ultra ដោយកន្លងមកនេះ គិតចាប់ពីម៉ូដែល Galaxy S20 Ultra បង្ហាញវត្តមានកាលពីឆ្នាំ 2020 និងថ្មីៗនេះម៉ូដែល Galaxy S22 Ultra គឺមានការបំពាក់នូវកាមេរ៉ាមុខទំហំដល់ទៅ 40MP។
ដូច្នេះ ប្រសិននបើក្រុមហ៊ុននេះនៅតែរក្សានូវយុទ្ធសាស្ត្រសម្រាប់ម៉ូដេល Ultra នេះ ជាមួយនិងវត្តមានរបស់ស្មាតហ្វូនស៊េរីថ្មី Galaxy S23 Ultra ប្រាកដណាស់ គឺនឹងមានការអាប់ដែតកាន់តែធំ និងមានសមត្ថភាពកាន់តែខ្ពស់ជាក់ជាមិនខាន។ យ៉ាងណាមិញ មុននឹងការមកដល់របស់ Galaxy S23 ក្រុមហ៊ុន Samsung នឹងមានការប្រកាសចេញនូវស្មាតហ្វូនបត់បានរបស់ខ្លួន Galaxy Z Fold4 នៅដើមខែសីហានេះសិន។
