ក្រុមហ៊ុន Xiaomi បានប្រកាសថា ខ្លួននឹងបង្ហាញចេញនូវស្មាតហ្វូន Xiaomi 12S series នៅសប្តាហ៍ក្រោយនេះហើយដែល ស្មាតហ្វូនប្រណិតថ្មីរបស់ក្រុមហ៊ុននេះ នឹងប្រកាសចេញជាផ្លូវការនៅថ្ងៃទី 4 ខែកក្កដានេះ។ ជាមួយនឹងការទម្លាយព័ត៌មាននៅលើ Weibo នេះ អ្នកប្រើប្រាស់អ៊ីនធឺណិតជាច្រើន ក៏បានចាប់ផ្តើមសួរនូវសំណួរជាច្រើនអំពីស្មាតហ្វូនថ្មីនេះផងដែរ។ លោក Lei Jun នាយកប្រតិបត្តិរបស់ក្រុមហ៊ុន Xiaomi ក៏បំភ្លឺអំពីរឿងនេះផងដែរ។
ស្មាតហ្វូន Xiaomi 12S Sries នឹងមាន 3 ម៉ូឌែលនោះគឺ Xiaomi 12S, Xiaomi 12S Pro និង Xiaomi 12S Ultra។ ក្រុមហ៊ុននេះ នៅមិនទាន់បង្ហាញនូវឈ្មោះផ្លូវការរបស់ស្មាតហ្វូននេះទេ។ ប៉ុន្តែនាយកប្រតិបត្តិរបស់ក្រុមហ៊ុននេះក៏ធ្វើការឆ្លើយតបទៅនឹងការចោទសួររបស់អ្នកប្រើប្រាស់នៅលើ Weibo ផងដែរ។ ក្រុមហ៊ុន Xiaomi បានប្រកាសបង្ហាញនូវស្មាតហ្វូន Xiaomi 12 និង Xiaomi 12 Pro រួចហើយកាលពីចុងឆ្នាំ 2021 នោះ។ ដូចនេះ សម្រាប់ឈ្មោះ Xiaomi 12S និង Xiaomi 12S Pro នឹងក្លាយជាស្មាតហ្វូនថ្មីរបស់ក្រុមហ៊ុននេះ។
ចុះចំនែកឈ្មោះXiaomi 12S Ultra ឬ Xiaomi 12 Ultra នោះ? លោក Lei Jun បានពន្យល់ថាស្មាតហ្វូន Xiaomi 12 Ultra នឹងប្រើប្រាស់នូវបន្ទះឈីប Qualcomm Snapdragon 8 Gen 1 ហើយស្មាតហ្វូននេះ មានគម្រោងនឹងបង្ហាញខ្លួននៅក្នុងខែមីនា ឬខែមេសាកន្លងទៅនេះ ប៉ុន្តែក្រុមហ៊ុននេះបានសម្រេចពន្យាពេលទៅវិញដោយរង់ចាំការមកដល់នៃបន្ទះឈីបជំនាន់ថ្មី។ ក្រុមហ៊ុននេះ នឹងប្រើប្រាស់នូវបន្ទះឈីប Qualcomm Snapdragon 8 Plus Gen 1 SoC នៅលើស្មាតហ្វូន Xiaomi 12S Ultra ជំនួស Xiaomi 12 Ultra វិញ៕
