ក្រុមហ៊ុន Samsung ត្រូវបានគេដឹងថា បាននឹងកំពុងតែរៀបចំនូវព្រឹត្តិការណ៌បង្ហាញចេញនូវស្មាតហ្វូនដែលមានអេក្រង់បត់បានជំនាន់ថ្មីរបស់ខ្លួននៅក្នុងពេលឆាប់ៗនេះហើយស្របពេលជាមួយគ្នានេះ ក៏មានការលើកឡើងថា ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងមួយនេះ ក៏បាននឹងកំពុងតែធ្វើការនៅលើស្មាតហ្វូនស៊េរីថ្មីថ្មី Galaxy S-Series ផងដែរ ខណៈដែលព័ត៌មានជាច្រើនបានបញ្ចេញនៅលើអនឡាញអស់ពេលយូរក្រែលដែរ។ នៅពេលនេះ បើតាមរបាយការណ៌ចុងក្រោយដែលជឿជាក់បាននោះ គឺបាននិយាយថា សម្រាប់មុខងារតេឡេហ្វូតូសម្រាប់កាមេរ៉ាមុខដែលប្រើប្រាស់លើស្មាតហ្វូន Samsung Galaxy S23 និង Galaxy S23 Plus នឹងមានការអាប់ដែតបន្ថែមនោះទេ។
យោងតាមរបាយការណ៌នេះបានបង្ហាញថា ស្មាតហ្វូន Samsung Galaxy S23 Series គឺនឹងប្រើប្រាស់នូវកាមេរ៉ាមុខទំហំ 10-Megapixel ដែលមានមុខងារតេឡេហ្វូតូដែលធ្លាប់បានប្រើប្រាស់នៅលើស្មាតហ្វូន Galaxy S22 និង S22 Plus អញ្ចឹងដែរ។ ខណៈដែលម៉ូដែលធំជាងគេ Galaxy S23 Ultra នៅមិនទាន់មានការបញ្ជាក់នោះទេ។ ជាមួយគ្នានេះ គេក៏មិនទាន់ដឹងថា សម្រាប់មុខងារតេឡេហ្វូតូដែលប្រើសម្រាប់កាមេរ៉ាក្រោយមានការផ្លាស់ប្តូរឬយ៉ាងណាដូចគ្នា។ ដូច្នេះមានតែរង់ចាំតាមដានបន្តទៀតតែប៉ុណ្ណោះ ទំរាំដល់ពេលដែលស្មាតហ្វូន Galaxy S23 Series បង្ហាញខ្លួនជាផ្លូវការ។
បន្ថែមពីនេះព័ត៌មានកន្លងមក ក៏មានការបញ្ជាក់ថា ស្មាតហ្វូនទាំងពីរ Samsung Galaxy S23 និង S23 Plus គឺនឹងមានការផ្លាស់ប្តូរនូវទំហំកាមេរ៉ាមុខផងដែរ។ ស្មាតហ្វូនលំដាប់ថ្នាក់ប្រណិតនេះ នឹងមានកាមេរ៉ាមុខ ទំហំ 12-Megapixel។ សម្រាប់កាលបរិច្ឆេតនៃការប្រកាសចេញ Samsung Galaxy S-Series នៅមិនទាន់មានការបញ្ជាក់ច្បាស់នៅឡើយទេ ប៉ុន្តែមានការរំពឹងថា ស្មាតហ្វូនជំនាន់ថ្មីនេះ នឹងបង្ហាញវត្តមាននៅខែមករា ឬខែកុម្ភៈឆ្នាំក្រោយ។
