ថ្មីៗនេះ ក្រុមហ៊ុន Xiaomi បានចេញមកបញ្ជាក់ជាផ្លូវការថា ខ្លួននឹងមានការប្រកាសចេញនូវស្មាតហ្វូន Xiaomi 12S ដែលជាម៉ូដែលស្មាតហ្វូនថ្នាក់ប្រណិតរបស់ខ្លួននៅថ្ងៃទី 4 ខែកក្កដាខាងមុខនេះហើយនៅថ្ងៃនោះ គឺមិនមែនមានតែស្មាតហ្វូនមួយប៉ុណ្ណោះ ក្រុមហ៊ុនបច្ចេកវិទ្យារបស់ចិនមួយនេះ ក៏មានការបង្ហាញនូវវត្តមានរបស់នាឡិកាឆ្លាតវៃ Xiaomi Band 7 Pro និងម៉ាស៊ីនកុំព្យូទ័រ Xiaomi Book Pro 2022 ផងដែរ។
បើតាមរូបភាពដែលការបញ្ចេញនៅពេលនេះ គឺមានការបញ្ជាក់ថា នាឡិកាឆ្លាតវៃ Band 7 Pro នឹងបង្ហាញវត្តមានជាមួយនិងពណ៌ខ្មៅ និងពណ៌មាន និងមានការពង្រីកទំហំអេក្រង់ធំជាងម៉ូដែលស្តង់ដារនៃនាឡិកា Smart Band 7 ផងដែរ។ សម្រាប់មុខងារវិញ គឺគេរំពឹងថា នឹងមានការប្រើប្រាស់នូវមុខងារតាមដានសុខភាព រួមជាមួយនិងមុខងារលំហាត់ប្រាណជាច្រើនប្រភេទ ប៉ុន្តែនៅមិនទាន់មានការបញ្ជាក់ផ្លូវការពី Xiaomi នៅឡើយទេ។
ងាកមកម៉ាស៊ីនកុំព្យូទ័រ Xiaomi Book Pro 2022 វិញ គឺនឹងមានកម្រ៉ាស់ស្តើង និងមានទម្ងន់ស្រាលហើយនិងមានអេក្រង់ទំហំ 14 អ៊ីង មានសមត្ថភាពអាចបង្ហាញចេញបានកម្រិត 4K ថែមទៀតផង។ នៅពេលនេះក្រុមហ៊ុន Xiaomi ក៏បានចែករំលែករូបភាពនៃផលិតផលថ្មីនេះផងដែរ ដោយថែមទាំងមានការបញ្ជាក់ថា តួររបស់ម៉ាស៊ីនកុំព្យូទ័រនេះគឺផលិតដោយលោហៈផងដែរ និងមានរន្ធ, USB-C រួមជាមួយនិងរន្ធ Headphone jack។ មានការរំពឹងថា យើងនឹងទទួលបានព័ត៌មានថ្មីៗជាច្រើនទៀតពីនាឡិកាឆ្លាតវៃ Band 7 Pro និងម៉ាស៊ីនកុំព្យូទ័រ Book Pro នេះក្នុងពេលឆាប់ៗនេះ មុនព្រឹត្តិការណ៌ប្រកាសចេញចូលមកដល់។