នៅទីបំផុត ក្រុមហ៊ុន Samsung បានបញ្ជាក់ថា ខ្លួននឹងរៀបចំនូវព្រឹត្តិការណ៍ Galaxy Unpacked របស់ខ្លួននៅវេលាម៉ោង 10 AM ET នៅថ្ងៃទី 11 ខែសីហានេះ។ ក្រុមហ៊ុននេះ បានបង្ហើបអំពីការបង្ហាញវត្តមានរបស់ស្មាតហ្វូនដែលអាចបត់បានផងដែរ។ នៅក្នុងពាក្យចចាមអារ៉ាមថ្មីៗនេះ បានបញ្ជាក់ថាក្រុមហ៊ុននេះនឹងបង្ហាញនូវស្មាតហ្វូន Galaxy Z Fold3 និង Galaxy Z Flip3 នៅក្នុងព្រឹត្តិការណ៍ថ្ងៃទី 11 ខែសីហានេះ។
ព្រឹត្តិការណ៍នេះ នឹងធ្វើឡើងតាមរយៈអនឡាញ ដែលនឹងមានការ Livestream ផងដែរនៅលើបណ្តាញសង្គមជាច្រើន។ ក្រៅពីការបង្ហាញនូវស្មាតហ្វូនដែលអាចបត់បាននោះ វាក៏នឹងមានវត្តមានរបស់ផលិតផលជាច្រើនទៀតដូចជា Galaxy Watch4, Galaxy Watch4 Classic និង Galaxy Buds2 ។ កាលពីប៉ុន្មានឆ្នាំមុននេះ ក្រុមហ៊ុន Samsung បានប្រកាសចេញនូវស្មាតហ្វូនត្រកូល Galaxy Note series របស់ខ្លួនណៅក្នុងខែសីហា។ យ៉ាងណាមិញ នៅក្នុងដើមឆ្នាំនេះ ក្រុមហ៊ុននេះ បានបញ្ជាក់ថា ខ្លួននឹងមិនបង្ហាញវត្តមានរបស់ស្មាតហ្វូន Galaxy Note 21 នោះទេនៅក្នុងឆ្នាំនេះ។
ស្មាតហ្វូន Galaxy Z Fold3 នឹងក្លាយជាស្មាតហ្វូនត្រកូល Fold series ដំបូងបំផុតដែលមានការទ្រទ្រង់នូវប៊ិច S Pen ។ ស្មាតហ្វូននេះ នឹងមានកាមេរ៉ាខាងក្រោមអេក្រង់ដំបូងបំផុតរបស់ក្រុមហ៊ុន Samsung ។ ស្មាតហ្វូន Galaxy Z Flip3 5G នឹងមានការឌីស្សាញជាមួយនឹងកាមេរ៉ាភ្លោះបញ្ឈរ និងអេក្រង់ទី 2 ធំជាងមុន។
នាឡិកា Galaxy Watch4 series នឹងមានបន្ទះឈីបដ៏ខ្លាំងក្លា Exynos W920 ហើយនិងមានម៉េមូរីទំហំ 16GB ។ នាឡិកា Watch4 នេះមាន One UI Watch ដែលជា version មួយទៀតរបស់ Wear OS ។ នាឡិកា Galaxy Buds 2 នឹងមានការទ្រទ្រង់ទៅលើ Active Noise Cancellation (ANC) ហើយវាមាន 3 ពណ៌ក្នុងការជ្រើសរើសផងដែរ។ ការនាំចេញនាឡិកា Watch4 seriesនេះនឹងចាប់ផ្តើមនៅថ្ងៃទី 11 ខែសីហានេះ ខណៈពេលដែលស្មាតហ្វូន Z Fold3 និង Z Flip3 នឹងចាប់ផ្តើមនៅថ្ងៃទី 27 ខែសីហានេះ៕