បើយើងនិយាយពីបច្ចេកវិទ្យាសាកថ្មស្មាតហ្វូនដែលមានល្បឿនលឿនដូចរន្ទះក្នុងពេលបច្ចុប្បន្នឃើញថា មានតែក្រុមហ៊ុនផលិតស្មាតហ្វូនល្បីមួយចំនួនរបស់ប្រទេសចិនដូចជា Xiaomi, OPPO, vivo, និង Huawei នោះទេ។ ដែលបច្ចេកវិទ្យាសាកភ្លើងរបស់ក្រុមហ៊ុនទាំងនេះគឺបានអភិវឌ្ឍន៍ឡើង និងបានដាក់អោយប្រើប្រើប្រាស់ផ្លូវការណ៍ចាប់ពីកំលាំង 33W, 45W, 65W, 67W រហូតដល់ 120W រួចហើយ។ យ៉ាងណាមិញក្រុមហ៊ុនទាំងនេះបាននឹងកំពុងបង្កើនការអភិវឌ្ឍន៍បច្ចេកវិទ្យាសាកភ្លើងរបស់ខ្លួនបន្តទៀតដែលមាកំលាំងសាកចេញចាប់ពី 125W, 160W រហូតដល់ 200W ឯណោះ។ ហើយក្រុមហ៊ុនដែលកំពុងធ្វើការលើបច្ចេកវិទ្យាសាកភ្លើង 200W បច្ចុប្បន្ន គឺក្រុមហ៊ុន Xiaomi។
ក្រុមហ៊ុនបច្ចេកវិទ្យាស្មាតហ្វូនរបស់ប្រទេសចិនដែលទើបឡើងកាន់តំណែងជាក្រុមហ៊ុនលេខ 2 ក្នុងទីផ្សារស្មាតហ្វូនពិភពលោកមួយនេះ ត្រូវបានគេដឹងថា កំពុងធ្វើការអភិវឌ្ឍន៍លើបច្ចេកវិទ្យាសាកថ្មស្មាតហ្វូនដែលមានកំលាំង 200W HyperCharge។ ហើយសម្រាប់បច្ចេកវិទ្យាសាកភ្លើងល្បឿនលឿនដូចផ្លេកបន្ទោលនេះ ធ្លាប់ត្រូវបាន Xiaomi បង្ហាញចេញក្នុងវីដេអូ Demo រួចទៅកាលពីចុងខែឧសភា ឆ្នាំ 2021 កន្លងទៅ ដែលបានតេស្តសាកបញ្ចូលជាមួយទូរស័ព្ទម៉ូដែល Mi 11 Pro។
ក្នុងវីដេអូ Demo នោះបានបង្ហាញអោយយើងឃើញច្បាស់ថា បច្ចេកវិទ្យា 200W HyperCharge របស់ Xiaomi គឺមានសមត្ថភាពសាកបំពេញថាម ពលថ្មទំហំ 4,000mAh របស់ Mi 11 Pro ពីចំនុច 0% ទៅពេញ 100% ប្រើពេលតែ 8 នាទីប៉ុណ្ណោះ និងសាកដោយមិនប្រើខ្សែ ឬ wireless Charge កំលាំង 120W ប្រើពេលប្រមាណ 15 នាទី។ ទោះជាយ៉ាងណា Xiaomi ក៏បានបញ្ជាក់ថា ជាមួយបច្ចេកវិទ្យា 200W HyperCharge របស់ខ្លួន គឺប្រើ ដោតសាក 800 ដង ទើបអាចកាត់បន្ថយអាយុកាលប្រើប្រាស់របស់ថ្មប្រមាណ 20% មានន័យថា អ្នកប្រើអាចដោតសាកថ្មស្មាតហ្វូនពេញ 100% រាល់ថ្ងៃបាន សម្រាប់រយះពេលជាងពីរឆ្នាំនៃអាយុកាលប្រើរបស់ថ្ម។
ជាចុងក្រោយបើតាមប្លុកទម្លាយព័ត៌មានរបស់ចិនឈ្មោះថា MyDrivers បានទម្លាយអោយដឹងថា បច្ចេកវិទ្យា 200W HyperCharge របស់ Xiaomi នឹងចាប់ផ្តើមប្រើប្រាស់នៅលើទូរស័ព្ទកំពូលៗយ៉ាងទូលំទូលាយ គឺចាប់ពីខែមិថុនា ឆ្នាំ 2022 ហើយទូរស័ព្ទកំពូលដំបូងគេដែលប្រើបច្ចេកវិទ្យាសាកភ្លើងល្បឿនលឿនដូចផ្លេកបន្ទោលនេះគឺ Xiaomi Mi 12 Ultra៕
