កន្លងមកយើងធ្លាប់តែលឺតែពីបន្ទះឈីបឧបករណ៍អេឡិចត្រូនិច និងស្មាតហ្វូនត្រូវបានគេផលិតឡើងដោយប្រើនូវសារធាតុ Silicon និងមិនធ្លាប់ដែរលឺពីបន្ទះឈីបដែលផលិតឡើងដោយសារធាតុ Plastic នោះទេ។ យ៉ាងណាមិញបន្ទះឈីបដែលផលិតឡើងពី Plastic នេះគឺធ្លាប់ត្រូវបានក្រុមហ៊ុន ARM បានប្រកាសបង្ហាញម្តងរួចទៅហើយកាលពីឆ្នាំ 2015 ប៉ុន្តែ វាមិនត្រូវបានក្រុមហ៊ុនធ្វើការផលិតក្នុងទ្រង់ទ្រាងធំឡើយ ឬអាចនិយាយបានថា គឺស្ថិតក្នុងដំណាក់កាលសាកល្បងផលិតក៏ថាបាន។
ដោយឡែកនៅក្នុងពេលនេះ ARM ក៏បានប្រកាសជាថ្មីថា បន្ទះឈីប PlasticArm នឹងមានប្រើនៅលើឧបករណ៍ឆ្លាតវៃជំនាន់ថ្មីៗដែលមានដូចជា Wearable sensors, Smart labels និង IoT (Internet of Things) ជាច្រើនទៀតក្នុងពេលឆាប់ៗនេះ។ PlasticArm ត្រូវបានផលិតឡើងដោយប្រើនូវបច្ចេកវិទ្យា metal-oxide thin-film transistor tech ដែលមានលក្ខណៈស្រដៀងគ្នានឹងហ្វីលកាមេរ៉ាថតខ្សែភាពយន្តស៊េរីមុនដែលធានាដល់ការកាច់បត់បាន។ បន្ទះឈីបនេះប្រើនូវប្រព័ន្ធ CPU កម្រិត 4-core ប្រភេទ Cortex-M0 32bit ដែលមាន 2,300 transistors ភ្ជាប់ដោយរ៉េមទំហំ 128-bytes និងទំហំផ្ទុក 456-bytes។
ទោះជាយ៉ាងណ ARM ក៏បានបញ្ជាក់ថា សម្រាប់ផ្នែករឹងសំខាន់ៗទៀតរបស់ PlasticArm Chip របស់ខ្លួននៅពេលអនាគតអាចនឹងត្រូវបង្កើនលទ្ធភាពបន្ថែមទៀត។ បន្ថែមពីនេះបន្ទះឈីបនេះ ក៏នឹងមានលទ្ធភាពអាចយកទៅប្រើការបាននៅលើទូរស័ព្ទស្មាតហ្វូន និងនាឡិកាដៃឆ្លាតវៃក្នុងពេលអនាកគតផងដែរ ដោយនឹងមានការបង្កើនកំលាំង CPU ឡើងដល់ 64bit ដូចបន្ទះឈីប Silicon បច្ចុប្បន្ននេះ៕