របាយការណ៍ថ្មីមួយចេញផ្សាយដោយលោក Mark Gurman នៅលើគេហទំព័រសារព័ត៌មានល្បីឈ្មោះ Bloomberg បាននិយាយថា កុំព្យូទ័រយួរដៃម៉ាក Apple MacBook Pro 14-inch និង 16-inch ទំនងជានឹងត្រូវប្រកាសចេញនាចន្លោះខែកញ្ញាទៅខែវិច្ឆិកាឆ្នាំ 2021។ ដោយក្នុងដំណាក់កាលនេះម៉ាស៊ីនកុំព្យូទ័រ MacOS ជំនាន់ថ្មីទាំងពីរម៉ូដែលនេះ ត្រូវបានគេសន្និដ្ឋានថា កំពុងស្ថិតនៅក្នុងសង្វាក់ផលិតកម្មរួចហើយ។
តាមការព្យាករណ៍ម៉ាស៊ីនកុំព្យូទ័រជំនាន់ថ្មីរបស់ក្រុមហ៊ុនបិតាបច្ចេកវិទ្យារបស់អាមេរិកមួយនេះ គឺនឹងត្រូវប្រកាសចេញលឿនជាងការរំពឹងទុក ប៉ុន្តែ ដោយសារសង្វាក់នៃការផលិតបន្ទះអេក្រង់ mini-LED Display សម្រាប់ម៉ាស៊ីនកុំព្យូទ័រជំនាន់ថ្មីនេះមានការយឺតយ៉ាវ ទើប Apple ត្រូវពន្យាពេលក្នុងការប្រកាសចេញ។
បើតាមរបាយការណ៍ដែលចេញផ្សាយនាពេលកន្លងមកបាននិយាយថា Apple MacBook Pro ជំនាន់ថ្មីឆ្នាំ 2021 នឹងបំពាក់នូវបច្ចេកវិទ្យាអេក្រង់ mini-LED Display ដែលផ្គត់ផ្គង់ដោយក្រុមហ៊ុនមួយឈ្មោះថា Osram Opto Semiconductors។ យ៉ាងណាសម្រាប់ការផលិតបន្ទះអេក្រង់ mini-LED Display ទំហំ 14-inch និង 16-inch សម្រាប់ម៉ាស៊ីន MacBook Pro 2021 របស់ក្រុមហ៊ុននេះត្រូវបានគេព្យាករណ៍ថា នឹងមានការពន្យាពេល ដូចនេះម៉ាស៊ីនកុំព្យូទ័រ MacBook Pro 2021 ទាំងពីរស៊េរីនេះក៏នឹងត្រូវពន្យាពេលចេញលក់រហូតដល់ដើមឆ្នាំ 2022 ផងដែរ។
ម៉ាស៊ីនកុំព្យូទ័រយួរដៃ Apple MacBook Pro 2021 Series ត្រូវបានគេដឹងថា នឹងមានការឌីស្សាញរូបរាងឡើងថ្មីខុសពីមុន, បំពាក់នូវបន្ទះអេក្រង់ថ្មី mini-LED Display, ដំណើរការលើបន្ទះឈីបថ្មី Apple M1X ដែលមាន CPU ឡើងដល់ 10-Core ខុសពីបន្ទះឈីប M1 ដែលប្រើនៅលើ MacBook Pro 2020 បច្ចុប្បន្នដែលមាន CPU 4+4 Core ហើយ GPU ក៏មានកំលាំងខ្លាំងជាងមុនផងដែរគឺឡើងពី 16-Core ទៅ 32-Core៕