កាលពីឆ្នាំមុននេះ ក្រុមហ៊ុន Sony បានបង្ហាញនូវម៉ាស៊ីនត្រជាក់តាមខ្លួន Reon Pocket ជំនាន់ថ្មីទី 2 ដែលមានឈ្មោះហៅថា Sony Reon Pocket 2។ ផលិតផលថ្មីនេះ គឺត្រូវបានក្រុមហ៊ុនធ្វើការតរចនាជាមួយនឹងរូបរាងស្រដៀងគ្នាទៅនឹងម៉ូឌែលជំនាន់មុននេះអញ្ចឹងដែរ ប៉ុន្តែបើមើលទៅលើការឌីស្សាញរបស់សមិទ្ធិផលថ្មីនេះ គឺមានការពង្រឹងទៅលើលក្ខណៈពិសេសខាងក្នុងជាច្រើន។ ក្រុមហ៊ុននេះ បានអះអាងថា ឧបករណ៍ថ្មីនេះ គឺមានសមត្ថភាពអាចស្រូបកំដៅបានទ្វេរដងជាមួយនឹងប្រព័ន្ធត្រជាក់ដ៏ខ្លាំងក្លាមែនទែន។
ក្រុមហ៊ុន Sony បាននិយាយថា ខ្លួនបានធ្វើការពង្រឹងទៅលើឧបករណ៍ Reon Pocket 2 ដែលល្អក្នុងការប្រើប្រាស់នៅពេលដែលធ្វើការហាត់ប្រាណ។ Reon Pocket 2 មិនមានការការពារធូលី និងការពារការជ្រាបទឹកនោះទេ។ សម្រាប់ឧបករណ៍ដែលបង្ហាញខ្លួនកាលពីឆ្នាំមុននេះ គឺប្រើប្រាស់នូវសីលីខុន ប៉ុន្តែសម្រាប់ពេលនេះ គឺក្រុមហ៊ុនបានធ្វើការ upgrade ទៅលើ SUS316L stainless steel សម្រាប់ប្រព័ន្ធត្រជាក់ ដែលមានសមត្ថភាពអាចផ្តល់នូវសីតុណ្ហភាពត្រជាក់បានលឿនសម្រាប់ស្បែកថែមទៀតផង។ ឧបករណ៍នេះ មានកម្រិតសីតុណ្ហភាពចំនួន 4 កម្រិតដែលអ្នកប្រើប្រាស់ជាច្រើនអាចធ្វើការផ្លាស់ប្តូរបានផងដែរ។
នៅក្នុងពេលនេះ ក្រុមហ៊ុននេះ បានធ្វើការសហការជាមួយនឹងម៉ាកយីហោកីឡាដ៏ល្បីល្បាញជាច្រើនដូចជា Le Coq Sportif, Munsingwear និង Descente នៅក្នុងការផលិតទៅលើឧបករណ៍នេះផងដែរ។ ក្រៅពីការប្រើប្រាស់នូវឧបករណ៍នេះ ជាមួយនឹងសម្លៀកបំពាក់ធម្មតាហើយនោះ ក្រុមហ៊ុននេះ ក៏បានធ្វើការឌីស្សាញនូវឧបករណ៍សម្រាប់ប្រើប្រាស់នៅត្រង់កផងដែរ។ សម្រាប់ឧបករណ៍ Sony Reon Pocket 2 នេះមានវិមាត្រ 54 mm x 20 mmx 116 mm (WHD) និងមានទម្ងន់ 92 g ដែលធ្ងន់ជាងម៉ូឌែលជំនាន់មុនដែលមានទម្ងន់ត្រឹមតែ 89 g ប៉ុណ្ណោះ។ ឧបករណ៍នេះ លក់នៅក្នុងប្រទេសជប៉ុនគឺមានតម្លៃ 14,850 yen ឬ $138 ។ វាមិនទាន់មានព័ត៌មានអំពីកាលបរិច្ឆេទនៃការលក់ឧបករណ៍នេះនៅក្នុងប្រទេសផ្សេងទៀតនោះទេ៕