កាលពីដើមខែមិថុនាកន្លងទៅក្រុមហ៊ុនអ្នកវិភាគមកពីស្ថាប័ន Wedbush បានអះអាងថា Apple iPhone 13 ទាំងអស់នឹងបំពាក់នូវបច្ចេកវិទ្យាសែន ស័រកាមេរ៉ា LiDAR ចំនែកម៉ូដែល Pro និង Pro Max គឺនឹងមានម៉េមូរីផ្ទុកក្នុងម៉ាស៊ីនដល់ 1 តេរ៉ាបៃ។ ក្រោយមករបាយការណ៍ចេញពីស្ថាប័ន TrendForce បានអះអាងផ្ទុយពីរបាយការណ៍ Wedbush ដោយបាននិយាយថា បច្ចេកវិទ្យាសែនស័រកាមេរ៉ា LiDAR គឺមានប្រើតែនៅលើម៉ូដែល iPhone 13 Pro ទាំងពីរដូចមុនប៉ុណ្ណោះ ហើយបងធំ iPhone ទាំងពីរនេះក៏នៅតែរក្សាទំហំម៉េមូរីផ្ទុកក្នុងម៉ាស៊ីនខ្ពស់បំផុតត្រឹម 512GB ដូចជំនាន់ iPhone 12 Pro និង 12 Pro Max ដដែល។
យ៉ាងណាមិញនៅក្នុងពេលនេះក្រុមអ្នកវិភាគរបស់ស្ថាប័ន Wedbush ដែលធ្វើការជិតស្និតជាមួយនឹងខ្សែសង្វាក់ផ្គត់ផ្គង់របស់ក្រុមហ៊ុនក្នុងតំបន់អាស៊ីនៅតែរក្សាការអះអាងរបស់ខ្លួនដូចមុនដដែល គឺថាគ្រប់ម៉ូដែល iPhone 12 Series ទាំងអស់គឺនឹងបំពាក់មកជាមួយនូវសែនស័រកាមេរ៉ា LiDAR ហើយម៉ូដែលបងធំ iPhone 13 Pro និង 13 Pro Max គឺនឹងមានម៉េមូរីទំហំធំបំផុតឡើងដល់ 1 តេរ៉ាបៃ។
ទោះជាយ៉ាងណា ក្រុមអ្នកវិភាគរបស់ស្ថាប័ន Wedbush មិនបានបង្ហាញលក្ខណៈលម្អិតអ្វីច្រើនឡើយក្នុងពេលនេះទាក់ទងនឹងទូរស័ព្ទ iOS ជំនាន់ថ្មីរបស់ Apple ប៉ុន្តែ ពួកគេបានធ្វើការព្យាករណ៍ទុកថា Apple អាចនឹងបង្កើនការលក់ iPhone 13 Series ក្នុងចំនួនចន្លោះពី 90 លានទៅ 100 លានគ្រឿង បើធៀបនឹងម៉ូដែល iPhone 12 Series បច្ចុប្បន្នដែលមានចំនួនក្នុងការលក់ប្រមាណ 80 លានគ្រឿង។ ហើយបរិមាណនេះ គឺមានកំណើនប្រមាណ 15% ធៀបការលក់ពីមួយឆ្នាំទៅមួយឆ្នាំ៕
