យោងតាមព័ត៌មានដែលចេញផ្សាយនាពេលកន្លងមក បានបញ្ជាក់ថា ការបង្ហាញវត្តមានរបស់ស្មាតហ្វូនស៊េរីថ្មី Huawei P50 Series គឺនឹងមានបំពាក់នូវកាមេរ៉ាដែលមានមុខងារ Zoom ថ្មីមានសមត្ថភាពខ្ពស់ជាងមុន។ មានសំណួរសួរតើ ក្រុមហ៊ុន Huawei នឹងនាំយកនូវកាមេរ៉ា 20X optical និង 200X Digital Zoom Telephoto នៅលើស្មាតហ្វូន Huawei P50 Pro Plus ដែរទេ?
បើតាមអ្នកទម្លាយដ៏ល្បីល្បាញបង្ហោះនៅលើ Weibo បានទម្លាយថា ស្មាតហ្វូន Huawei P50 នឹងប្រើប្រាស់នូវបច្ចេកវិទ្យា 20X Optical Zoom និង 20X Digital Zoom ដែលនេះគឺជាការពង្រឹងទៅលើសមត្ថភាពកាមេរ៉ានាពេលកន្លងមកដែលក្រុមហ៊ុននេះ ប្រើប្រាស់ត្រឹមតែ 10x Optical និង 100x Digital Zoom ប៉ុណ្ណោះ។ មុខងារថ្មីនេះ ត្រូវបានគេរំពឹងថា គឺធ្វើអោយគុណភាពរូបភាពកាន់តែល្អជាងមុន។ ទាំងនេះ គឺជាព័ត៌មានបែកធ្លាយនោះទេ ក្រុមហ៊ុន Huawei នៅមិនទាន់មានការបញ្ជាក់ជាផ្លូវការអំពីកម្រិតនៃការ Zoom ជាក់លាក់នៅលើស្មាតហ្វូន Huawei P50 នេះទេ។
សូមជំរាបថា សម្រាប់អេក្រង់ដែលប្រើប្រាស់នៅលើស្មាតហ្វូនជំនាន់ថ្មីៗនាពេលនេះ ត្រូវបានគេដឹងថា ក្រុមហ៊ុន Huawei នឹងប្រើប្រាស់នូវអេក្រង់របស់ក្រុមហ៊ុន BOE ហើយនៅលើស្មាតហ្វូន Huawei P50 Series ក៏នឹងប្រើប្រាស់នូវផលិតផលរួមជាតិនេះដែរ។ ការផ្លាស់ប្តូរមួយនេះ គឺនឹងអាចអោយក្រុមហ៊ុន ចិនមួយនេះ សន្សំបានលុយជាច្រើនពីការបញ្ជាទិញពីក្រុមហ៊ុន Samsung និង LG នាពេលកន្លងមក៕
