Xiaomi នឹងប្រកាសចេញផលិតផលថ្មីៗរបស់ខ្លួននៅខែសីហាឆ្នាំ 2021 ខាងមុខនេះ។ ហើយសម្រាប់ផលិតផលថ្មីៗរបស់ក្រុមហ៊ុននេះក៏ត្រូវបានប្រភពព័ត៌មានជាច្រើនបានធ្វើការចុះផ្សាយពីលក្ខណៈសម្បត្តិ និងគុណសម្បត្តិនានារបស់ពួកវាផងដែរក្នុងមួយរយះពេលចុងក្រោយនេះ។ ដូចជាក្នុងពេលនេះយើងទទួលបានព័ត៌មានថ្មីមួយទៀត ទាក់ទងនឹងបច្ចេកវិទ្យាសាកថ្មរបស់ផលិតផលថ្មីៗរបស់ Xiaomi តាមរយះវិញ្ញាបនបត្របញ្ជាក់ការផលិតរបស់ស្ថាប័ន C3 របស់ប្រទេសចិន។
នៅលើវិញ្ញាបនបត្រ C3 បានបង្ហាញពីផលិតផល Xiaomi ដែលមានលេខកូដសំគាល់ម៉ូដែល M2105K81AC និង M2105K81C ដែលត្រូវបានគេដឹងថា ជាលេខកូដសំគាល់ម៉ូដែលរបស់ឧបករណ៍ Mi Pad 5 Series។ C3 Certification បានបញ្ជាក់ថា ឧបករណ៍ថ្មីទាំងពីរនេះគឺជា Tablet ដំបូងរបស់ Xiaomi ដែលគាំទ្របច្ចេកវិទ្យាសេវា 5G រួមនឹងបច្ចេកវិទ្យាសាកថ្មល្បឿនលឿនកំលាំងដល់ 67W។ ចំនែកម៉ូដែលទីបី គឺមានលេខកូដសំគាល់ម៉ូដែល 21051182C ដែលគាំទ្របច្ចេកវិទ្យាសាកថ្មកំលាំង 33W ដែលគេសន្និដ្ឋានថាជាម៉ូដែល Mi Pad 5 Lite។
ទន្ទឹមនឹងនេះកាលពីពេលថ្មីៗនេះក៏មានរបាយការណ៍មួយចំនួនបានចុះផ្សាយថា Mi Pad 5 នឹងបំពាក់នូវបន្ទះអេក្រង់កម្រិត Full-HD+ ទំហំ 11 អ៊ីញ មានល្បឿន refresh rate 120Hz, បំពាក់នូវបន្ទះឈីប Snapdragon 870 SoC, មានកាមេរ៉ាក្រោយទំហំ 48MP និងគាំទ្របច្ចេកវិទ្យាសាកថ្មល្បឿនលឿនកំលាំង 67W ផងដែរ។ ហើយសម្រាប់មួយម៉ូដែលទៀត គឺប្រើបន្ទះឈីប Snapdragon 860, មានកាមេរ៉ាទំហំ 12MP រីឯម៉ូដែល Mi Pad 5 Lite គឺនឹងគាំទ្របច្ចេកវិទ្យាសាកថ្មត្រឹម 22.5W ប៉ុណ្ណោះ មិនដល់ 33W នោះទេ។
បន្ថែមពីនេះនៅលើវិញ្ញាបនបត្រ C3 ក៏បានបញ្ជាក់ពីបច្ចេកវិទ្យាសាកភ្លើងរបស់កំពូលស្មាតហ្វូនជំនាន់ថ្មី Xiaomi Mi Mix 4 ផងដែរ។ ដោយកំពូលស្មាតហ្វូនជំនាន់ថ្មីនេះ គឺមានលេខកូដម៉ូដែល 2106118C គាំទ្របច្ចេកវិទ្យាសាកភ្លើងល្បឿនលឿនកំលាំង 120W និងទូរស័ព្ទឆ្លាតម៉ូដែលចុងក្រោយគឺ Mi CC11 មានលេខកូដម៉ូដែល 2107119DC និងគាំទ្របច្ចេកវិទ្យាសាកថ្មកំលាំង 33W៕
