ក្រុមហ៊ុន Qualcomm បានប្រកាសចេញកំពូលឈីបនាគជំនាន់ថ្មីរបស់ខ្លួនស៊េរី Snapdragon 888 Plus កាលពីចុងខែមិថុនាកន្លងទៅ។ កំពូលឈីបជំនាន់ថ្មីនេះ ត្រូវបានក្រុមហ៊ុនបង្កើនសមត្ថភាពទៅលើល្បឿនប្រតិបត្តិការទៅលើបច្ចេកវិទ្យា AI ខ្លាំងជាងជំនាន់ Snapdragon 888 ប្រមាណ 20% និងល្បឿន CPU កើនឡើងដល់ 2.995GHz បើធៀបនឹង SD888 ដែលមានល្បឿន 2.84GHz។ បន្ទះឈីបនាគរាជកំពូលជំនាន់ថ្មីនេះត្រូវបានគេដឹងថានឹងមានប្រើបំពាក់នូវលើកំពូលស្មាតហ្វូន Android ជំនាន់ថ្មីៗនៅឆមាសទី 2 ក្នុងឆ្នាំ 2021 នេះ។ ទោះជាយ៉ាងណា មកទល់នឹងពេលនេះគឺមិនទាន់ឃើញមានក្រុមហ៊ុនផលិតស្មាតហ្វូន Android ណាមួយបានប្រើបន្ទះឈីបកំពូលនេះនៅលើស្មាតហ្វូនរបស់ខ្លួននៅឡើយទេ។
ដោយឡែកងាកមកក្រុមហ៊ុនផលិតស្មាតហ្វូនម៉ាក iQOO របស់ចិនដែលជាក្រុមហ៊ុនស្ថិតក្នុងការគ្រប់គ្រងរបស់ក្រុមហ៊ុន vivo ទើបបានបញ្ចេញវីដេអូ teaser ខ្លីមួយដែលចង់បង្ហាញពីការមកដល់សម្រាប់កំពូលស្មាតហ្វូនជំនាន់ថ្មីរបស់ខ្លួន។ បើតាមរយះវីដេអូដែលបានបង្ហោះដោយគណនី Weibo ក្រុមហ៊ុន iQOO គឺបានបញ្ជាក់ពីកាលបរិច្ឆេទនៃការមកដល់សម្រាប់កំពូលស្មាតហ្វូនជំនាន់ថ្មីរបស់ខ្លួនតាមរយះគ្រាប់ស្នុកឃឺដែលមានលេខ 4 និងលេខ 8 ដែលត្រូវបានគេសន្និដ្ឋានថាគឺនៅថ្ងៃទី 04 ខែ សីហា ខែក្រោយនេះ។ ហើយកំពូលស្មាតហ្វូនជំនាន់ថ្មីរបស់ក្រុមហ៊ុននេះត្រូវបានគេដឹងថាគឺជាម៉ូដែល iQOO 8 ដែលជាអ្នកស្នងដំណែងម៉ូដែល iQOO7 ដែលបានប្រកាសចេញលក់នៅលើទីផ្សារសកលអស់រយះពេលជិត 6 ខែមកហើយចាប់តាំងពីការប្រកាសចេញកាលពីខែកុម្ភៈ ឆ្នាំ 2021។
បើតាមប្រភពព័ត៌មានចចាមអារាមដែលបានចុះផ្សាយនាពេលកន្លងមកបានអោយដឹងថា ក្រៅតែពីបំពាក់កំពូលឈីប Snapdragon 888 Plus ហើយ កំពូលស្មាតហ្វូន iQOO8 នឹងមានភ្ជាប់មកមជាមួយរ៉េមទំហំដល់ 16GB និងម៉េមូរីផ្ទុកទិន្នន័យក្នុងម៉ាស៊ីនទំហំ 512GB។ ជាងនេះទៅទៀត iQOO8 នឹងបំពាក់នូវអេក្រង់ AMOLED ដែលមានល្បឿន refresh rate 120Hz ឬអាចដល់ 144Hz រួមទាំងមានថ្មទំហំ 4,000mAh និងទ្រទ្រង់បច្ចេកវិទ្យាសាកភ្លើងល្បឿនលឿនកំលាំងខ្លាំងដល់ 120W របស់ក្រុមហ៊ុនផ្ទាល់ទៀតផង៕