ត្រឡប់ទៅក្នុងខែឧសភា ឆ្នាំ 2021 ក្រុមហ៊ុន Xiaomi បានប្រកាសចេញកាសស្តាប់ស៊េរីថ្មីម៉ូដែល Redmi Air Dots 3 Pro នៅប្រទេសចិន ហើយឥលូវនេះកាស TWS ស៊េរីថ្មីនេះត្រូវបានក្រុមហ៊ុននាំយកទៅប្រកាសចេញលក់នៅលើទីផ្សារសកលក្រោមការវាយស្លាកឈ្មោះថ្មីថា Redmi Buds 3 Pro។ សម្រាប់តម្លៃដែលត្រូវចេញលក់នៅលើទីផ្សារសកលគឺខ្ទង់ $60 ប៉ុន្តែ នៅកំឡុងពេលនៃការនាំចេញនេះ Xiaomi បានបញ្ចុះតម្លៃយ៉ាងពិសេសគឺនៅត្រឹម $40 ប៉ុណ្ណោះ។
សម្រាប់គុណសម្បត្តិរបស់កាសស្តាប់ TWS Redmi Air Dots 3 Pro ឬ Redmi Buds 3 Pro មានដូចជាបំពាក់នូវ Driver Sound ខ្នាត 9mm និងមានរន្ធម៉ិចស្រូបសំឡេងចំនួន 3 នៅលើគ្រាប់កាសសម្រាប់ប្រើ មុខងារកាត់បន្ថយសំឡេងរំខានពីខាងក្រៅ ក៏ដូចជាការស្រូបនូវសំឡេងសន្ទនាទូរស័ព្ទជាដើម។ សម្រាប់មុខងារ ANC ឬ Active Noise Cancellation របស់ Redmi Buds 3 Pro គឺមានលទ្ធភាពទប់សំឡេងបានកម្រិត 35dB។
ទៅលើការតភ្ជាប់ជាមួយស្មាតហ្វូន ឬឧបករណ៍កម្សាន្តផ្សេងៗទៀតវិញ គឺអាចធ្វើទៅបានតាមរយះបច្ចេកវិទ្យា Bluetooth v5.2 ដែលអាចភ្ជាប់ឧបករណ៍បានពីក្នុងពេលតែមួយ។ ចំពោះថ្មវិញ Redmi Ari Dots 3 Pro ឬ Buds 3 Pro គឺអាចកាន់ប្រើបានដល់ 28 ម៉ោងដោយប្រើសាកជាមួយប្រអប់របស់វា ដែលប្រអប់របស់កាសនេះ គឺអាចសាកថ្មបានតាមរយះ wireless charge និងតាមរយះរន្ធចម្លង USB-C។ កាសស្តាប់ឥតប្រើខ្សែជំនាន់ថ្មីនេះ គឺចាប់ផ្តើមចេញលក់នៅថ្ងៃនេះទៅតាមរយះក្រុមហ៊ុនដឹកជញ្ចូន និងចែកចាយ AliExpress ដែលមានជម្រើសពីរពណ៌ គឺពណ៌ខ្មៅ និងប្រផេះ៕