កាលពីថ្ងៃទី 19 ខែកក្កដា ឆ្នាំ 2021 កន្លទៅថ្មីៗនេះ ស្មាតហ្វូន Honor Magic 3 ត្រូវប្រទះឃើញនៅក្នុងការផ្សព្វផ្សាយពាណិជ្ជកម្មថ្មីនៅក្នុងប្រទេសចិន។ នៅក្នុងការផ្សព្វផ្សាយថ្មីនេះ គឺមានការបង្ហាញអំពីការឌីស្សាញផ្នែកខាងមុខរបស់ស្មាតហ្វូននេះដែលមានអេក្រង់ punch hole selfie សម្រាប់កាមេរ៉ា 2 គ្រាប់ផងដែរ។ ក្រុមហ៊ុនផលិតស្មាតហ្វូនរបស់ចិននេះបានចែករំលែកវីដេអូផ្សព្វផ្សាយថ្មីនេះនៅលើទូរទស្សន៍ CCTV (China Central Television) របស់ចិន និងបង្ហោះវីដេអូខ្លីមួយនៅលើ Weibo ផ្លូវការរបស់ខ្លួនផងដែរ។
ប្រភពខាងលើនេះបានបញ្ជាក់ថា ក្រុមហ៊ុននេះ ក៏បានត្រៀមខ្លួនក្នុងការប្រកាសចេញនូវស្មាតហ្វូន Magic 3 series នេះនៅថ្ងៃទី 12 ខែសីហាឆ្នាំ 2021 ផងដែរនេះ។ បើមើលទៅលើវីដេអូនេះ ផ្នែកខាងមុខរបស់ស្មាតហ្វូននេះគឺមានគែម Bezels ស្តើង។ ស្មាតហ្វូននេះមានកាមេរ៉ា Selfie ភ្លោះយ៉ាងទាក់ទាញ។ របាយការណ៍មុននេះបានទម្លាយថា ស្មាតហ្វូន Magic 3 នេះនឹងមានបន្ទះឈីប Snapdragon 888+ SoC។
បន្ថែមពីនេះទៀតនោះ ស្មាតហ្វូននេះ មានអេក្រង់ទំហំ 6.7 inch QHD+ AMOLED និងទ្រទ្រង់នូវ HDR10+ និង 120Hz high refresh rate ។ ស្មាតហ្វូន Magic 3 Pro+ នេះនឹងមានកាមេរ៉ាខាងក្រោមអេក្រង់ និងទ្រទ្រង់នូវបច្ចេកវិទ្យា 100W fast charging ផងដែរ៕