ថ្មីៗនេះ មានរបាយការណ៍ជាច្រើន ដែលនិយាយអំពីស្មាតហ្វូន Samsung Galaxy Note Series។ ប៉ុន្តែរបាយការណ៍ថ្មីៗមួយចំនួន បានបញ្ជាក់ថា ក្រុមហ៊ុន Samsung នឹងមិនបន្តទៅលើការបញ្ចេញស្មាតហ្វូនត្រកូល Note Series នៅលើទីផ្សារទៀតនោះទេ។ ការព្យាករណ៍នេះ គឺដោយសារតែស្មាតហ្វូន Samsung Galaxy Z Fold3 បានបង្ហាញខ្លួនជាមួយនឹងការប្រើប្រាស់ S Pen។ បើមើលទៅលើស្មាតហ្វូន Galaxy S21 Ultra ក៏ប្រើប្រាស់នូវ S Pen ផងដែរ។ សម្រាប់ Samsung Stylus ជាធម្មតា គឺប្រើប្រាស់ផ្តាច់មុខទៅលើស្មាតហ្វូន Note Series ប៉ុណ្ណោះ។
ការប្រើប្រាស់នូវប៊ិចនេះនៅលើស្មាតហ្វូនផ្សេងៗជាច្រើនម៉ូឌែលនោះអាចនឹងជាសញ្ញាមួយដែលបង្ហាញថា ស្មាតហ្វូន Note series នឹងមិនមានម៉ូឌែលថ្មីចេញទៀតនោះទេ។ យ៉ាងណាមិញ នៅក្នុងរបាយការណ៍ជាច្រើនបញញជាក់ថា ស្មាតហ្វូន Samsung Galaxy Note 22 series នឹងត្រៀមខ្លួនរួចរាល់នៅក្នុងឆ្នាំ 2022 នេះ។ លក្ខណៈពិសេសរបស់ស្មាតហ្វុណ Samsung Galaxy Note 22 series នេះ គឺប្រើប្រាស់ជាមួយនឹង S Pen Stylus។
យ៉ាងណាមិញ នៅក្នុងប៉ាតង់ថ្មីរបស់ក្រុមហ៊ុន Samsung ក៏មានការបង្ហាញថា S Pen នេះនឹងមានការបន្ថែមនូវមុខងារថ្មីៗផងដែរ។ នៅក្នុងប៉ាតង់នេះបង្ហាញថា ក្រុមហ៊ុន Samsung បានបន្ថែមនូវ Wireless កាមេរ៉ានៅលើ S pen នេះដែលអាចប្រើប្រាស់បាននូវមុខងារច្រើនផងដែរ។ មុខងារទី 1 របស់ S Pen នេះ គឺសម្រាប់ជំនួសកាមេរ៉ាខាងមុខ និងប្រើប្រាស់ជា magnetic pop-upនៅពេលដែលប្រើប្រាស់វា។ មុខងារទី 2 របស់ S Pen នេះ គឺកាមេរ៉ានេះ អាចដកចេញបាន និងប្រើប្រាស់ជា Wireless កាមេរ៉ាបានសម្រាប់ការថតរូបភាព Selfies និងមុខងារជាច្រើនទៀត។
ប៉ាតង់នេះ ក៏មានការបង្ហាញថា កាមេរ៉ា S Pen នេះ អាចទំនាក់ទំនងជាមួយនឹងស្មាតហ្វូននេះ តាមរយៈ WIFI, Bluetooth ឬ NFC ផងដែរ។ បន្ថែមពីនេះទៀតនោះ ស្មាតហ្វូន ដែលមានមុខងារពេញលេញរបស់ S Pen នេះ ក៏អាចបញ្ជាពីចម្ងាយក្នុងការគ្រប់គ្រងទៅលើកាមេរ៉ាគោលរបស់ស្មាតហ្វូននេះបានផងដែរ៕