ក្រុមហ៊ុនបច្ចេកវិទ្យាខ្នាតយក្ស Samsung បានបង្ហាញចេញបច្ចេកវិទ្យាកាមេរ៉ាសែនហ្វីបង្កប់ក្រោមអេក្រង់ (UDC) ដំបូងរបស់ខ្លួនមានទំហំ 4MP ដែលបានប្រើនៅលើ Galaxy Z Fold 3។ ក្រោយមកក៏មានព័ត៌មានចចាមអារាមមួយចំនួនបាននិយាយថា សម្រាប់កំពូលស្មាតហ្វូនត្រកូល Galaxy S22 Series ដែលចេញនៅដើមឆ្នាំក្រោយ (2022) ក៏នឹងបំពាក់នូវបច្ចេកវិទ្យាកាមេរ៉ាសែលសហ្វីបង្កប់ក្រោមអេក្រង់ផងដែរ។
ដោយឡែកបើតាមការលើកឡើងដោយគណនី Ice Universe បានបញ្ជាក់ផ្ទុកទៅវិញថា Samsung Galaxy S22 Series នឹងនៅបន្តប្រើសែនស័រកាមេរ៉ាសែលហ្វីទំហំ 10MP ស្ថិតនៅលើលែនទំលុះថ្ងាសអេក្រង់ដូចជំនាន់ S21 Series ដដែល មិនប្រើសែនស័រកាមេរ៉ាបង្កប់ក្រោមអេក្រង់នោះទេ។
បើតាមប្រភពបានបញ្ជាក់ថា សម្រាប់ប្រព័ន្ធកាមេរ៉ាខាងក្រោយរបស់ម៉ូដែល Galaxy S22 និង S22+ នឹងប្រើសែនស័រថ្មីទំហំ 50MP Main ជាមួយសែនស័រ Telephoto 3x ទំហំ 12MP និងសែនស័រ Ultra-wide ទំហំ 12MP។ ចំនែកប្រព័ន្ធកាមេរ៉ារបស់ម៉ូដែល Galaxy S22 Ultra វិញគឺនឹងរក្សាទម្រង់ដូចជំនាន់ S21 Ultra ដដែលមិនលោតដល់សែនស័រថ្មី 200MP ISOCELL HP1 នោះទេ។ Ice Universe បានបញ្ជាក់បន្ថែមទៀតថាប្រព័ន្ធកាមេរ៉ារបស់ Galaxy S22 Ultra នឹងមានលែនពង្រីកចំនួនពីរដែលមានសមត្ថភាពធ្វើការបានប្រសើរជាងមុនកម្រិត 3x និង 10x ហើយលែនទាំងពីរនេះក៏មានមុខងារ continuous zoom និងមានសែនស័រទំហំធំដល់ 12MP ដូចគ្នាផងដែរ។ ចំនែកកាមេរ៉ាសែលហ្វីនៅលើម៉ូដែល S22 Ultra គឺនឹងមានទំហំ 40MP។
Samsung Galaxy S22 Series នឹងមកដល់ផ្លូវការណ៍នាដើមឆ្នាំ 2022 ខាងមុខអាចចន្លោះខែមករា និងខែកុម្ភៈ។ កំពូលស្មាតហ្វូនជំនាន់ថ្មីត្រកូល Galaxy S-Series នឹងបំពាក់មកជាមួយបន្ទះឈីបជំនាន់ថ្មី Qualcomm Snapdragon 895 ហើយនិងបន្ទះឈីបជំនាន់ថ្មីស៊េរី Exynos 2200 របស់ Samsung ផ្ទាល់៕