នៅថ្ងៃនេះ មានការទម្លាយចេញនូវព័ត៌មានថ្មីថា ព្រឹត្តិការណ៍នៃការបង្ហាញវត្តមានរបស់កុំព្យូទ័រលេងហ្គេម Redmi G 2021 ជំនាន់ទី 2 របស់ក្រុមហ៊ុន Redmi គឺឆាប់ៗនេះហើយ។ គួរបញ្ជាក់ផងដែរថា ក្រុមហ៊ុន Redmi បានបង្ហាញនូវកុំព្យូទ័រលេងហ្គេមជំនាន់ទី 1 របស់ខ្លួននៅក្នុងខែសីហា ឆ្នាំ 2020 កន្លងទៅនេះ។ រយៈពេលមួយឆ្នាំក្រោយមក ក្រុមហ៊ុនបុត្រសម្ព័ន្ធរបស់ក្រុមហ៊ុន Xiaomi នេះ គ្រោងនឹងបង្ហាញនូវកុំព្យូទ័រលេងហ្គេមជំនាន់ថ្មីផងដែរ។
នៅក្នុងព័ត៌មានថ្មីនេះ គឺបានទម្លាយថា កុំព្យូទ័រលេងហ្គេមជំនាន់ថ្មីរបស់ក្រុមហ៊ុន Redmi នេះ នឹងមានឈ្មោះហៅថា Redmi G 2021 ។ បន្ថែមពីនេះទៀតនោះ Redmi G គឺមានគោលដៅសម្រាប់អ្នកប្រើប្រាស់ដែលមិនចង់ចំណាយទឹកប្រាក់ច្រើននៅលើកុំព្យូទ័រលេងហ្គេមប្រភេទ High-End ដែលចូលចិត្តបច្ចេកវិទ្យាថ្មីនិងសំបូរបែប។ នៅក្នុងការបង្ហោះរបស់ Weibo គឺមានការបញ្ជាក់ថា កុំព្យូទ័រ Redmi G 2021 នឹងដាក់លក់នៅក្នុងពេលឆាប់ៗនេះ។
បើមើលទៅលើកុំព្យូទ័រ Redmi G Laptop ជំនាន់ដំបូងរបស់ខ្លួននោះគឺមានប្រភេទបន្ទះឈីប Intel Core i5 H-series Processors ជំនានទី 10 ជាមួយនឹងក្រាហ្វិកកាត NVIDIA GTX 1650 GPU ខណៈពេលដែលប្រភេទ High-End របស់ក្រុមហ៊ុននេះគឺប្រើប្រាស់នូវបន្ទះឈីប Core i7 ជាមួយនិងក្រាហ្វិកកាត GTX 1650 Ti Graphics។ ប្រភពដដែលនេះ បានបន្តទម្លាយថា សម្រាប់កុំព្យូទ័រ Redmi G 2021 នេះ គឺនឹងមានអេក្រង់ទំហំដល់ទៅ 16.1-inch បង្ហាញចេញជាមួយនឹងកម្រិតល្បឿន 144Hz refresh rate។ ហើយសម្រាប់តម្លៃរបស់កុំព្យូទ័រ Redmi G 2021 នេះវិញ គឺប្រហាក់ប្រហែលជា $760៕