យើងដឹងហើយថា Apple ក្នុងមួយឆ្នាំចេញផលិតផលជំនាន់ថ្មីរបស់ខ្លួនតែមួយជំនាន់តែប៉ុណ្ណោះដូចជានាឡិកាដៃឆ្លាតវៃ Apple Watch Series នេះឯង។ ហើយឆ្នាំនេះ Apple Watch Series បានចេញដល់ជំនាន់ទី 7 ហើយគឺ Apple Watch Series 7។ ដូច្នេះចង់ដឹងថានាឡិកាដៃឆ្លាតវៃជំនាន់ទី 7 ដែលទើបនឹងចេញមកនេះមានចំនុចកែប្រែថ្មីពីជំនាន់ទី 6 ដែលចេញកាលពីឆ្នាំមុនត្រង់ណាខ្លះ? តោះស្វែងយល់ត្រួសៗពី Apple Watch Series 7 ទាំងអស់គ្នាដូចខាងក្រោមនេះ៖
បើយើងពិនិត្យទៅលើការរចនារូបរាងទូទៅរបស់ Apple Watch Series 7 ហាក់មិនខុសពីជំនាន់មុនរបស់វានោះទេ គ្រាន់តែ Apple បានពង្រីកទំហំអេក្រង់ធំជាងមុនបន្តិច ប៉ុន្តែរក្សាទំហំតួរនាឡិកានៅដដែល និងបានកាត់បន្ថយគែម bezel អេក្រង់ស្តើងស្អាតជាងមុនមកនៅត្រឹម 1.7mm ដែលស្តើងជាងនៅលើជំនាន់ Watch Series 6 ប្រមាណ 40% ដែលធ្វើឲ្យផ្ទៃអេក្រង់របស់ Watch Series 7 លាតធំជាងមុន 20% នេះបើតាមការបញ្ជាក់ពី Apple ផ្ទាល់។ ហើយផ្ទៃអេក្រង់របស់ Apple Watch Series 7 ក៏នៅតែរក្សាភាពកោងផងដែរ គ្រាន់តែមិនសូវជាកោងខ្លាំងដូចជាជំនាន់មុនឡើយ។
ហើយសម្រាប់ប្រព័ន្ធការពារទឹក និងធូលី Apple បានប្រើនូវបច្ចេកវិទ្យាថ្មីហៅថា WR50 water resistance ជំនួសឲ្យបច្ចេកវិទ្យា IP6X ដែលប្រើនៅលើជំនាន់ទី 6 ផងដែរ ដែលបច្ចេកវិទ្យាថ្មីនេះធន់នឹងទឹកបានជម្រៅ 50 ម៉ែត្រ។ Apple Watch Series 7 ប្រតិបត្តិការដោយ WatchOS ជំនាន់ថ្មីដែលរចនាបថ UI ថ្មី និងមានភ្ជាប់មកជាមួយមុខងារប្រើប្រាស់ថ្មីៗជាច្រើនថែមទៀតផងដូចជា Full QWERTY Keyboard ដើម្បីវាយអត្ថបទតបសារគាំទ្រជាមួយ tap និង slide ដោយប្រើមុខងារ Apple QuickPath ជាដើម។
សម្រាប់អេក្រង់របស់ Apple Watch Series 7 ជាប្រភេទ Retina LTPO-OLED ដែលមានកម្រិតពន្លឺ 1,000nits ប៉ុន្តែ Apple មិនបានបញ្ជាក់ពីទំហំនៅឡើយទេ។ សម្រាប់ផ្ទៃបាតខាងក្រោមនាឡិកាត្រូវបានស្រោបដោយសារធាតុ ceramic / sapphire crystal back និងមានស៊ុមជាប្រភេទអាលុយមីញ៉ូម ហើយក៏មានជម្រើស 3 ម៉ូដែលផ្សេងទៀតដែលមានស្រោបដោយសារធាតុ Stainless Steel និង Titanium ផងដែរ។ សម្រាប់ថាមពលថ្មវិញ Apple បានបញ្ជាក់ថា Apple Watch Series 7 មានថ្មកាន់បាន 18 ម៉ោងដូចនៅលើជំនាន់មុនដែរ ប៉ុន្តែ មានល្បឿនសាកថ្មលឿនជាងមុន 33% តាមរយះឆ្នាំងសាកថ្មីដែលប្រើរន្ធចម្លងប្រភេទ USB-C ដែលសាកពី 0% ទៅដល់ 80% ប្រើពេលត្រឹមតែ 45 នាទី។
Apple មិនទាន់បានបញ្ជាក់ពីថ្ងៃដាក់ឪ្យធ្វើការបញ្ជាទិញមុន និងការចេញលក់ផ្លូវការណ៍សម្រាប់ Apple Watch Series 7 នោះទេ។ យ៉ាងណាមិញសម្រាប់តម្លៃបឋមរបស់នាឡិកាដៃឆ្លាតវៃជំនាន់ថ្មីនេះ គឺខ្ទង់ចាប់ពី $399 ឡើង បើធៀបនឹង Apple Watch Series 3 ដែលមានតម្លៃចាប់ពី $199 និង Watch SE មានតម្លៃចាប់ពី $279៕