កាលពីដើមខែកញ្ញានេះមានរបាយការណ៍មួយបានចុះផ្សាយថាក្រុមហ៊ុន OPPO និង Kodak បានចាប់ដៃសហការណ៍គ្នាដើម្បីធ្វើការអភិវឌ្ឍន៍ផលិតនូវសែនស័រកាមេរ៉ាភ្លោះទំហំ 50MP សម្រាប់ប្រើនូវលើកំពូលស្មាតហ្វូន OPPO ជំនាន់ក្រោយ។ ដោយឡែកនៅក្នុងពេលនេះយើងក៏បានឃើញលេចចេញនូវវត្តមានទូរស័ព្ទ OPPO ដែលជាម៉ូដែល Find X3 Pro ដែលមានការឌីស្សាញឡើងបែបថ្មីប្លែកពី Find X3 Pro ដែលបានចេញកាលពីអំឡុងខែមិនាកន្លងទៅ។
បើតាមរូបភាព Find X3 Pro ដែលបានបង្ហាញចេញមកនេះគឺត្រូវបានគេធ្វើការកែប្រែរចនាបថផ្ទៃខ្នងខាងក្រោយដោយពាក់កណ្តាលខាងលើគឺជាផ្ទៃកញ្ចក់ និងពាក់កណ្តាលមកក្រោមគឺត្រូវបានស្រោបដោយស្បែកពណ៌ខ្មៅ ដែលការឌីស្សាញឡើងបែបនេះគឺដូចគ្នាទៅនឹងកាមេរ៉ាថតរូបម៉ូដែល Kodak 35 Classic អីចឹង។ ទោះជាយ៉ាងណាគេមិនបានបង្ហាញនូវពណ៌មានលម្អិតអំពីស្មាតហ្វូន Find X3 Pro ជំនាន់ថ្មីនេះនោះទេ។ ប៉ុន្តែ បើមើលទៅលើស្ទីគ័រដែលបិទលើផ្ទៃខ្នងខាងក្រោយបានបង្ហាញថាស្មាតហ្វូននេះមានលេខកូដម៉ូដែលថា PEEM00។
ដូចដែលយើងបានដឹងហើយថាបច្ចុប្បន្ននេះក្រុមហ៊ុនផលិតស្មាតហ្វូននៅទូទាំងពិភពលោក គឺភាគច្រើនបានចាប់ដៃគូសហការជាមួយក្រុមហ៊ុនផលិតកាមេរ៉ាដើម្បីធ្វើការអភិវឌ្ឍន៍បច្ចេកវិទ្យាកាមេរ៉ាសម្រាប់បំពាក់នៅលើទូរស័ព្ទស្មាតហ្វូនរបស់ពួកគេ។ ហើយបច្ចុប្បន្ននេះយើងឃើញមានជាអាទិ៍ដូចជា Huawei សហការជាមួយក្រុមហ៊ុនផលិតកាមេរ៉ាឈ្មោះថា Leica របស់ប្រទេសអាល្លឺម៉ង, SONY, vivo, និង Nokia សហការជាមួយក្រុមហ៊ុន Zeiss, OnePlus សហការជាមួយក្រុមហ៊ុន Hasselblad ហើយពេលនេះ OPPO ក៏ប្រកាសចាប់ដៃសហការជាមួយ Kodak ដែលជាក្រុមហ៊ុនផលិតកាមេរ៉ាល្បីឈ្មោះរបស់សហរដ្ឋអាមេរិកផងដែរ៕
