បើតាមកាលបរិច្ឆេតនោះ គឺមានការបញ្ជាក់ថា ក្រុមហ៊ុន Samsung នឹងបង្ហាញនូវស្មាតហ្វូន Galaxy S22 series នៅដើមឆ្នាំក្រោយនេះ ហើយជាធម្មតាក្រុមហ៊ុនផលិតស្មាតហ្វូនដ៏ធំរបស់ប្រទេសកូរ៉េខាងត្បូងមួយនេះ នឹងបង្ហាញនូវស្មាតហ្វូនជំនាន់ថ្មីនេះជាមួយបន្ទះឈីប Flagship ចំនួន 2 ផ្សេងគ្នា។ បើតាមព័ត៌មានបែកធ្លាយកន្លងមកនោះក៏បាននិយាយថា ស្មាតហ្វូននេះ នឹងមានបន្ទះឈីប Samsung Exynos 2200 និង Qualcomm Snapdragon 898 SoC។
តាមការបញ្ជាក់នៅក្នុងរបាយការណ៍ជាច្រើននោះ បានបញ្ជាក់អោយដឹងថា បន្ទះឈីប Exynos 2200 នឹងមានស្ថាបត្យកម្ម AMD RDNA architecture GPU។ ដូចនេះ កម្លាំងម៉ាស៊ីនរបស់ស្មាតហ្វូននេះ ក៏នឹងខ្លាំងក្លាជាងជំនាន់មុនរបស់វាផងដែរ។ របាយការណ៍ចុងក្រោយបំផុតបញ្ជាក់ថា ស្មាតហ្វូន Samsung Galaxy S22 នេះក៏បង្ហាញខ្លួននៅលើ Database របស់ GeekBench ផងដែរ។
នៅក្នុងការតេស្តទៅលើបន្ទះឈីប Exynos 2200 Flagship Processor ទៅលើពិន្ទុ Single-Core គឺមានចំនួន 1073 ខណៈពេលដែល Multi-Core របស់វា គឺមានចំនួន 3389។ ពិន្ទុនេះអាចប្រកួតប្រជែងយកឈ្នះទៅលើបន្ទះឈីប Qualcomm Flagship, Snapdragon 888+ ផងដែរ។ បន្ទះឈីប Exynos 2200 នឹងប្រើប្រាស់នូវ 3-Cluster Architecture ។ វាមាន 2.59Ghz Cortex-X2 super core, 3x 2.5GHz Cortex-A78 និង 4x 1.73GHz Cortex-A55 ។
តាមការបញ្ជាក់ចេញពីប្រភពជាច្រើននោះ បន្ទះឈីប Exynos 2200 នេះគឺជាបន្ទះឈីបដ៏ខ្លាំងក្លាក្នុងការប្រើប្រាស់។ ស្មាតហ្វូន Samsung Galaxy S22 Series នឹងក្លាយជាស្មាតហ្វូនដំបូងបំផុត ដែលប្រើប្រាស់នូវបន្ទះឈីប Exynos 2200 SoC នេះ។ យ៉ាងណាមិញ ដោយសារតែបញ្ហានៅក្នុងការផលិតអោយបានគ្រប់គ្រាន់នោះ ស្មាតហ្វូនGalaxy S22 ដែលបំពាក់នូវបន្ទះឈីប Exynos 2200 នេះអាចនឹងដាក់លក់នៅក្នុងទីផ្សារជាក់លាក់ប៉ុណ្ណោះ៕