កាលពីសប្តាហ៍មុននេះ ក្រុមហ៊ុន Apple បានប្រកាសចេញជាផ្លូវការណ៍នូវស្មាតហ្វូន iPhone 13 series ហើយកាលពីម្សិលមិញនេះ ក្រុមហ៊ុនក៏បានដាក់អោយធ្វើការ Pre-Orders សម្រាប់ទីផ្សារធំៗចំនួន 30 ប្រទេសផងដែរ។ បើតាមការបញ្ជាក់របស់ក្រុមហ៊ុនបានអោយដឹងថា ស្មាតហ្វូន iPhone 13 Series អាចនឹងធ្វើការដឹកជញ្ជូនទៅកាន់ទីផ្សារដែលបានធ្វើការបញ្ជាទិញទាំងនេះ នៅថ្ងៃទី 24 ខែកញ្ញា ខាងមុខនេះ ហើយសម្រាប់ម៉ូដែលធំៗទាំងពីរ iPhone 13 Pro និង Pro Max គឺត្រូវបានក្រុមហ៊ុន Apple ប្រកាសធ្វើការពន្យាពេលនៅក្នុងការដឹកញ្ជូនទៅកាន់ខែក្រោយផងដែរ គឺអាចនឹងនៅចន្លោះពីថ្ងៃទី 06 ដល់ថ្ងៃ 11 ខែតុលាខាងមុខនេះ។
បន្ថែមពីនេះ ក៏មានការបញ្ជាក់ថា សម្រាប់ iPhone 13 ពណ៌មានដែលមានទំហំ 256GB និង iPhone 13 Pro Max គ្រប់ទំហំ គឺនឹងត្រូវធ្វើការដឹកជញ្ជូនទៅកាន់ហាងនានាចន្លោះពីថ្ងៃទី 06 ដល់ថ្ងៃ 11 ខែតុលាខាងមុខនេះដូចគ្នា។ ប៉ុន្តែសម្រាប់ iPhone 13 Pro ដែលមានទំហំ 128GB និង 256GB ពណ៌ Silver, Graphite, Gold ហើយនឹងពណ៌ Sierra Blue colors គឺនឹងចាប់ផ្តើមដឹកជញ្ជូននៅថ្ងៃទី 24 ខែកញ្ញានេះហើយ ក្នុងនោះក៏មានទំហំ 512GB ពណ៌ Gold និង Sierra Blue ផងដែរ។
ជាមួយនឹងការប្រកាសពន្យាពេលសម្រាប់ការដឹកជញ្ជូន iPhone 13 Pro និង Pro Max នៅក្នុងពេលនេះ គឺមិនមែនមានន័យថា ក្រុមហ៊ុននេះ មានការពង្រីកនូវសង្វាក់ផលិតកម្ម ឬក៏ការផលិតមានលក្ខណៈប្រសើរជាងមុននោះទេ កត្តាខាងលើនេះ ត្រូវបានគេនិយាយថា អាចមកពីក្រុមហ៊ុន Apple មិនមានស្តុកគ្រប់គ្រាន់សម្រាប់តម្រូវការរបស់អតិថិជនរបស់ខ្លួន បន្ទាប់ពីការប្រកាសចេញនូវម៉ូដែលថ្មីទាំងពីរនេះ មានការចាប់អារម្មណ៍ខ្លាំងបំផុតនោះ។
