Nokia បានប្រកាសចេញ Android Tablet ដំបូងរបស់ខ្លួនកាលពីឆ្នាំ 2014 ម៉ូដែល Nokia N1 ហើយមកទល់នឹងពេលបច្ចុប្បន្ននេះ Nokia មិនបានបង្ហាញចេញវត្តមាន Tablet ថ្មីណាមួយបន្តទៀតនោះទេ ទើបតែពេលនេះ គឺមានរបាយការណ៍ថ្មីបានចុះផ្សាយពីវត្តមាន Tablet ជំនាន់ថ្មីរបស់ Nokia។
ក្នុងរបាយការណ៍ដែលបានចុះផ្សាយថ្មីៗនេះបានឲ្យដឹងថា Nokia Tablet ជំនាន់ថ្មី គឺមានឈ្មោះថា Nokia T20 ដោយ Tablet ជំនាន់ថ្មីនេះបានបែកធ្លាយចេញតាមរយះបណ្តាញវ៉ិបសាយហាងលក់រាយនៅប្រទេសអារ៉ាប់រួម និងចក្រភពអង់គ្លេសកាលពីពេលថ្មីៗនេះ ដែលមានលេខកូដសំគាល់ TA-1392 និង TA-1397។ ហើយNokia Tablet ទាំងពីរម៉ូដែលនេះក៏ធ្លាប់ត្រូវបានគេប្រទះឃើញបង្ហាញនៅលបញ្ចីរបស់ស្ថាប័ន Eurasian Economic Commission (EEC) រួចហើយដែលកាលពីអំឡុងខែកក្តដាកន្លងទៅ។
ហើយនៅពេលនេះ Nokia Tablet ស៊េរីថ្មីមួយទៀតដែលមានលេខកូដ TA-1392 បានលេចឡើងនៅលើបញ្ចីទទួលស្គាល់ការផលិតពីស្ថាប័នមួយទៀតរបស់ចិនឈ្មោះថា China Quality Certification ហៅកាត់ថា CQC។ លើវិញ្ញាបនប័ត្រ CQC បានបង្ហាញថា Nokia TA-1392 Tablet គាំទ្រកំលាំងសាកភ្លើង 10W, អាចនឹងប្រើបន្ទះឈីប Unisoc Processor ស៊េរី Unisoc T618 ឬ Unisoc T70 ជាមួយអង្គក្រាហ្វិច Mali-G52។ Nokia TA-1392 ឬ Nokia T20 Tablet អាចនឹងមានអេក្រង់ទំហំ 10.36 អ៊ីញ ប្រតិបត្តិការដោយ Android 11, មានរ៉េមទំហំ 4GB និងម៉េមូរីផ្ទុកក្នុងម៉ាស៊ីនទំហំ 64GB។ Tablet ជំនាន់ថ្មីនេះនឹងមានជម្រើសម៉ូដែលប្រើ Wi-Fi Only និង Wi-Fi + 4G LTE។ សម្រាប់តម្លៃវិញត្រូវបានគេព្យាការណ៍ជាបឋមថា អាចមានៃចន្លោះពី $262 ដល់ $285 និងមានជម្រើសពណ៌ខៀវតែមួយប៉ុណ្ណោះ។
ជាមួយគ្នានេះដែរបញ្ចីស្ថាប័ន CQC ក៏បានបង្ហាញពីស្មាតហ្វូន Nokia ម៉ូដែលថ្មីមួយទៀតផងដែរ ដែលមានលេខកូដសំគាល់ថា TA-1399។ CQC បានបង្ហាញថា ស្មាតហ្វូន Nokia TA-1399 គឺគាំទ្របច្ចេកវិទ្យាសាកភ្លើងកំលាំង 18W។ បន្ថែមពីនេះស្មាតហ្វូនស៊េរីថ្មីម៉ូដែល Nokia G50 ក៏ត្រូវបានគេប្រទះឃើញនៅលើបញ្ចីរបស់ស្ថាប័ន TENAA កាលពីដើមខែកញ្ញានេះផងដែរ។ ដូចនេះសរុបមកទាំង Nokia T20 Tablet, ស្មាតហ្វូន Nokia TA-1399 និង Nokia G50 ត្រូវបានគេរំពឹងថានឹងបង្ហាញចេញនៅប្រទេសចិនក្នុងពេលឆាប់ៗខាងមុខនេះ៕