ដូចការសន្យាមែន នៅទីបំផុត Xiaomi បានប្រកាសចេញកុំព្យូទ័រយួរដៃដែលជា Gaming Laptop ស៊េរីថ្មីស៊េរី Redmi G2021។ ម៉ាស៊ីនកុំព្យូទ័រយួរដៃហ្គេមីងជំនាន់ថ្មីនេះត្រូវបានក្រុមហ៊ុនបំពាក់មកជាមួយ CPU របស់ AMD និង GPU ស៊េរី RTX30 Series របស់ Nvidia។ Redmi G2021 បំពាក់មកជាមួយអេក្រង់ទំហំ 16.1 អ៊ីញមានល្បឿន 144Hz និងអាចទម្លាក់មក 74Hz នៅពេលមិនដំណើរការលេងហ្គេម។
នៅក្នុងម៉ាស៊ីនរបស់ Redmi G2021 ត្រូវបានក្រុមហ៊ុនបង្កើនផលិតភាពទៅលើប្រព័ន្ធ Hurricane Cooling 3.0 system ដើម្បីជួយរក្សាតុល្យភាពនៃភាពត្រជាក់ក្នុងម៉ាស៊ីនបានប្រសើរជាងមុនជាមួយនឹងប្រព័ន្ធកង្ហាលកំលាំង 12V ចំនួនពីរ និងបំពង់សារធាតុត្រជាក់ចំនួន 5 (five all-copper heat pipes) ដើម្បីជួយរក្សាភាពត្រជាក់ក្នុងម៉ាស៊ីន និងរក្សាស្ថិរភាពល្បឿនបានល្អប្រសើរជាងមុន។
ម៉ាស៊ីនកុំព្យូទ័រយួរដៃហ្គេមីងជំនាន់ថ្មីរបស់ Xiaomi នេះភ្ជាប់មកជាមួយរ៉េមទំហំ 16GB ថាសរឹងផ្ទុកឯកសារទំហំ 512GB ប្រព័ន្ធ Wi-Fi 6 ប្រព័ន្ធ Speaker គាំទ្រមុខងារសំឡេង DTS:X Ultra 3D audio និងមានផ្ទាំងក្តារចុចជាប្រភេទ Backlit keyboard ដែលអាចកំនត់កម្រិតពន្លឺភ្លើង LED នៅខាងក្រោម Keyboard បានបីកម្រិត។ សម្រាប់កំលាំងម៉ាស៊ីនរបស់ Redmi G2021 ត្រូវបានចែកចេញជាពីរជម្រើសផ្សេងគ្នា ជាមួយជម្រើសប្រើអង្គ CPU Intel ស៊េរី Core i5-11260H (Tiger Lake CPU) មានអង្គគណនា 6-core គាំទ្រមុខងារ Turbo Frequency boost ដែលអាចបង្កើនល្បឿនរត់ឡើងខ្ពស់បំផុតកម្រិត 4.4GHz និងភ្ជាប់ជាមួយអង្គ GPU Nvidia GeForce RTX3050។
ចំនែកជម្រើសមួយទៀតគឺប្រើ CPU AMD ស៊េរី Ryzen 5800H រត់លើប្រព័ន្ធ eight Zen 3-cores CPU ផ្តល់នូវល្បឿនអូសខ្លាំងបំផុតកម្រិត 4.4GHz។ សម្រាប់ម៉ូដែល AMD Ryzen នេះគឺមានភ្ជាប់មកជាមួយអង្គ GPU Nvidia GeForce RTX3060 មានកំលាំង TDP 130W។ ជាមួយកំលាំង TDP 130W នេះ AMD ក៏បានបង្កើនកំលាំងឆ្នាំងសាកឡើងដល់ 230W ផងដែរ ខណៈម៉ូដែលប្រើ Intel-core i5 CPU ប្រើឆ្នាំងសាកកំលាំង 180W។ នៅលើ Nvidia RTX3060 GPU មានកម្រិតល្បឿន CUDA core 3,840 និងមាន memory bus 192-bit ខណៈ RTX3050 មានកម្រិត CUDA core 2,048 ជាមួយ memory bus ត្រឹម 128-bit។
Xioami បានប្រកាសចេញលក់កុំព្យូទ័រយួរដៃម៉ូដែល Redmi G2021 បំពាក់នូវ Intel-corei5 CPU នៅទីផ្សារប្រទេសចិនផ្លូវការណ៍ហើយជាមួយតម្លៃខ្ទង់ប្រហែល $888។ ចំនែកម៉ូដែលប្រើ AMD Ryzen 5800H នឹងមានចេញលក់នៅថ្ងៃទី 28 កញ្ញា សប្តាហ៍ក្រោយនេះជាមួយតម្លៃខ្ទង់ប្រហែល $1080៕
