កាលពីម្សិលមិញនេះ ក្រុមហ៊ុន Xiaomi នៅក្នុងប្រទេសឥណ្ឌូនេស៊ី បានប្រកាសនៅលើបណ្តាញ Twitter របស់ខ្លួនអំពីកាលបរិច្ឆេទក្នុងការដាក់លក់ថេប្លេត Xiaomi Pad 5 នៅក្នុងប្រទេសនៅតំបន់អាស៊ាន។ ថេប្លេត Pad 5 នេះ បានបង្ហាញវត្តមាននៅក្នុងប្រទេសចិននៅដើមឆ្នាំនេះ និងថ្មីៗនេះនៅក្នុងអ៊ឺរ៉ុប។ ថេប្លេតនេះ ដាក់លក់ជាលើកដំបូងនៅក្នុងអ៊ឺរ៉ុប ហើយវាលក់អស់រលីងនៅក្នុងរយៈពេលតែប៉ុន្មាននាទីប៉ុណ្ណោះ។
ក្រុមហ៊ុនបច្ចេកវិទ្យាយក្សរបស់ចិននេះ បានដាក់លក់ទំហំ 6GB និង 256GB នៅក្នុងទីផ្សាររបស់ប្រទេសឥណ្ឌូនេស៊ីជាមួយនឹងតម្លៃ Rp. 4,999,000 (~€299) ដែលមានតម្លៃថោកជាងទីផ្សាររបស់អ៊ឺរ៉ុបដែលមានតម្លៃ €399។ ថេប្លេត Pad 5 នឹងដាក់លក់ចាប់ពីថ្ងៃទី 28 ខែកញ្ញានេះ ហើយនឹងដាក់លក់នៅក្នុងពេលដំណាលគ្នានៅលើវេបសាយ Mi.com, JD.ID, Akulakuand នៅលើហាងលក់ផលិតផលក្នុងស្រុករបស់ក្រុមហ៊ុន Xiaomi ផងដែរ។
ថេប្លេត Xiaomi Pad 5 នេះ មានអេក្រង់ 11-inch LCD ជាមួយនឹងកម្រិតភាពច្បាស់ 2560x1600 pixels, refresh rate 120Hz, PPI 275 និងកម្រិតcontrast ratio 1500:1 ផងដែរ។ ថេប្លេតនេះ ប្រើប្រាស់នូវបន្ទះឈីប Snapdragon 860 រ៉េមទំហំ 6GB និងម៉េមូរីទំហំ 128GB និង 256GB ។
ថេប្លេត Pad 5 នេះ គឺមានការពង្រឹងទៅលើកាមេរ៉ារបស់វាជាមួយនឹងការបំពាក់នូវកាមេរ៉ាទំហំ 13MP ជាមួយនឹងភ្លើង LED Flash។ សម្រាប់កាមេរ៉ាខាងមុខរបស់វាគឺមានទំហំ 8MP ដែលទ្រទ្រង់នូវ Face Unlock ផងដែរ។ ថេប្លេតមាន Speakers ចំនួន 4 គ្រាប់។ ថេប្លេត Mi Pad 5 នេះមានថាមពលថ្មទំហំ 8720mAh ជាមួយនឹង 33W Fast Charging។ ថេប្លេតនេះដំណើការនូវ MIUI ផងដែរ៕