OnePlus 9RT ត្រូវបានគេបញ្ជាក់ថា គឺមានការរៀបចំប្រព័ន្ធសារធាតុត្រជាក់ថ្មី អាចធ្វើការបានប្រសើរជាងមុន 20%

ទូរស័ព្ទជំនាន់ថ្មីរបស់ក្រុមហ៊ុន OnePlus ម៉ូដែល 9RT ត្រូវបានគេដឹងថានឹងមកដល់ផ្លូវការណ៍នាថ្ងៃទី 13 ខែតុលាស្អែកនេះ។ ហើយបើតាមរយះផ្ទាំងរូបភាពផ្សព្វផ្សាយដែលទើបបែកធ្លាយថ្មីៗនេះបានបង្ហាញថាទូរស័ព្ទជំនាន់ថ្មី OnePlus 9RT គឺមានការបង្កើនលើសមត្ថភាពសំពាធសំគាល់ផ្ទៃអេក្រង់ និងប្រព័ន្ធសារធាតុត្រជាក់បែបថ្មី។ តាមរូបភាពដដែលនេះគឺបានបង្ហាញថា OnePlus 9RT គឺមានសំពាធសំគាល់លើផ្ទៃអេក្រង់ Touch Sampling Rate ខ្ពស់រហូតដល់ទៅ 600Hz ឯណោះ។ 

បើតាមការបង្ហើបចេញពី OnePlus ផ្ទាល់បានបញ្ជាក់ថាជាមួយអេក្រង់ដែលមាន touch sampling rate 600Hz នៅលើ OnePlus 9RT នឹងជួយឲ្យការចុចបញ្ជាបានលឿនរហ័សជាងមុនដល់ទៅ 57% និងកាត់បន្ថយភាពអាក់ទាក់របស់អេក្រង់បាន 47% ផងដែរ។ ស្មាតហ្វូនជំនាន់ថ្មីនេះត្រូវបានរៀបចំផលិតឡើងដោយមានការចូលរួមពីក្រុមការងារ OnePlus eSport team។ OnePlus 9RT គឺមានអេក្រង់ទំហំ 6.55 អ៊ីញជាបន្ទះអេក្រង់ E4 OLED របស់ Samsung ដែលមានកម្រិតល្បឿន refresh rate 120Hz។

បន្ថែមពីនេះនៅលើប្រព័ន្ធម៉ាស៊ីនរបស់ OnePlus 9RT ក៏ត្រូវបានក្រុមហ៊ុនធ្វើការរៀបចំនូវប្រព័ន្ធសារធាតុត្រជាក់ឡើងថ្មីដែលមានរហូតដល់ទៅ 5 ស្រទាប់ (five-layer structure) ដែលលាតធំស្ទើរតែពាសពេញផ្ទៃរបស់ម៉ាស៊ីន។ ស្មាតហ្វូនជំនាន់ថ្មីនេះ គឺនឹងប្រើជាមួយបន្ទះឈីបកំពូលរបស់ Qualcomm គឺ Snapdragon 888។ ជាមួយប្រព័ន្ធសារធាតុត្រជាក់ថ្មីដែលប្រើនៅលើ OnePlus 9RT គឺជួយបន្សាបកំដៅម៉ាស៊ីនបានប្រសើរជាងនៅលើម៉ូដែល OnePlus 9R ដល់ទៅ 20%។ OnePlus បានបញ្ជាក់ទៀតថា OnePlus 9RT គឺមានជម្រើសពណ៌ខ្មៅ និងទឹកប្រាក់ ហើយស្មាតហ្វូនជំនាន់ថ្មីនេះក៏មានមុខងារជំនួយរ៉េម (Virtual RAM) បានរហូតដល់ទៅ 7GB ថែមទៀតផង។ សម្រាប់គុណសម្បត្តិលម្អិតផ្សេងៗទៀតរបស់ OnePlus 9RT យើងនឹងបានដឹងនៅថ្ងៃស្អែកនេះហើយ៕