កាលពីដើមសប្តាហ៍នេះ ក្រុមហ៊ុន Xiaomi បានបង្ហាញនូវយុទ្ធសាស្រ្តសេវាកម្មរបស់ខ្លួន ដែលមានគោលដៅក្នុងការដាក់អោយប្រើប្រាស់នៅលើអាជីវកម្ម និងក្រុមហ៊ុនសហគ្រាសជាច្រើនជាលើកដំបូងបំផុត។ ក្រុមហ៊ុននេះ បានទម្លាយអំពីការអភិវឌ្ឍទៅលើអាជីវកម្ម ToB របស់ខ្លួនដែលបង្កើតឡើងនៅក្នុងខែមករា ឆ្នាំ 2021 កន្លងទៅនេះ។ តាមការបញ្ជាក់របស់លោក Wang Xiang ដែលជាប្រធានក្រុមហ៊ុនបច្ចេកវិទ្យាយក្សរបស់ចិន បាននិយាយថា “យើងបានឃើញនូវគុណប្រយោជន៍ជាច្រើនអំពីអតិថិជនរបស់យើង ដែលផ្តោតទៅលើក្រុមហ៊ុនសហគ្រាស។ គោលដៅនៃអាជីវកម្ម ToB គឺអាចផ្តល់នូវយុទ្ធសាស្រ្តឈ្នះៗសម្រាប់អ្នកគ្រប់គ្នា។”
បន្ថែមពីនេះទៀតនោះ លោក Bai Peng អនុប្រធាននៃអាជីវកម្ម ToB របស់ក្រុមហ៊ុន Xiaomi បានទម្លាយថា អាជីវកម្មរបស់ខ្លួនបានបែងចែកជា 2 ផ្នែក។ វាមានការផ្តោតទៅលើឧបករណ៍ Terminal និងប្រព័ន្ធអេកូឡូស៊ីឆ្លាតវៃ (intelligent ecology)។ ឧបករណ៍ Terminal នេះ មានដូចជាស្មាតហ្វូន ទូរទស្សន៍ Speakers ថេប្លេត និងជាច្រើនទៀត។ សម្រាប់ប្រព័ន្ធអេកូឡូស៊ីឆ្លាតវៃ (intelligent ecology) នេះគឺមានការផ្ដល់នូវដំណោះស្រាយទៅលើឧស្សាហកម្មធំៗចំនួន 5 គឺលំនៅដ្ឋាន សណ្ឋាគារ អាផាតមិន ការិយាល័យ និងការថែទាំមនុស្សចាស់។
លោក Bai Peng បានបន្ថែមថា សម្រាប់ឧបករណ៍ Terminal នេះបានក្លាយជាចំណែកធំបំផុតនៃអាជីវកម្ម ToB របស់ក្រុមហ៊ុននេះ។ ឧបករណ៍នេះគឺប្រើប្រាស់នៅលើឧស្សាហកម្មច្រើនជាង 15 ហើយចំនួននៃការលក់គឺច្រើនជាង 1 លានគ្រឿង។ បន្ថែមពីនេះទៀតនោះ ប្រព័ន្ធអេកូឡូស៊ីឆ្លាតវៃ (intelligent ecology) នេះគឺប្រើប្រាស់នៅលើទីក្រុងច្រើនជាង 15 នៅក្នុងប្រទេសចិន ហើយក្រុមហ៊ុននេះក៏បង្កើននូវចំនួនអ្នក Activate ទៅលើ Terminal ច្រើនជាង 1 លានគ្រឿងជារៀងរាល់ឆ្នាំ៕