នៅពេលនេះ ទីផ្សារស្មាតហ្វូនសកល ត្រូវបានគេមើលឃើញថា គឺមានការធ្លាក់ចុះដោយសារតែកង្វះខាតទៅលើបន្ទះឈីបដែលមិនអាចបំពេញនូវតម្រូវការបស់ក្រុមហ៊ុនផលិតស្មាតហ្វូនជាច្រើនស្របពេលដែលតម្រូវការរបស់អ្នកប្រើប្រាស់ គឺមានការហក់ឡើងខ្ពស់ជាងរាល់ឆ្នាំ។
គិតមកដល់ពេលនេះ ក្រុមហ៊ុន Samsung គឺបាននាំមុខគេជាមួយនឹងចំនែកទីផ្សារស្មាតហ្វូននេះ ដែលបានក្តោបបានចំនួន 23% នៃទីផ្សារសរុប។ ក្រុមហ៊ុន Xiaomi បានធ្លាក់ពីចំណាត់ថ្នាក់លេខ 2 ដែលខ្លួនទទួលបាននៅឆ្នាំនេះផងដែរបន្ទាប់ពីក្រុមហ៊ុនបច្ចេកវិទ្យា Apple មានតម្រូវការខ្ពស់ទៅលើស្មាតហ្វូន iPhone 13 នោះ។
Xiaomi ដែលជាក្រុមហ៊ុនផលិតស្មាតហ្វូនដ៏ធំរបស់ប្រទេសចិនមួយនេះ គឺបានជាប់ចំណាត់ថ្នាក់លេខ 2 ដែលមានចំនែកទីផ្សារចំនួន 14%។ សម្រាប់ក្រុមហ៊ុន vivo ដែលជាបងប្អូនរួមជាតិ គឺបានជាប់ចំណាត់ថ្នាក់លេខ 4 ហើយក្រុមហ៊ុន OPPO ដែលជាបងប្អូនសាច់ឈាមគ្នា ក៏បានជាប់លេខ 5 ដែលមានចំនែកទីផ្សារចំនួន 10% ដូចគ្នាផងដែរ។
លោក Ben Stanton ដែលជាអ្នកវិភាគរបស់ក្រុមហ៊ុន Canalys បាននិយាយថា ឧស្សាហកម្មស្មាតហ្វូននេះ គឺបានព្យាយាមក្នុងការតស៊ូក្នុងការផលិតស្មាតហ្វូន អោយបានច្រើនបំផុតតាមតែអាចធ្វើទៅបាន ស្របពេលដែលក្រុមហ៊ុនផលិតបន្ទះឈីប ក៏បង្កើនទៅលើតម្លៃនៃបន្ទះឈីបផងដែរ។ យ៉ាងណាមិញ កង្វះខាតទៅលើបន្ទះឈីបនេះ អាចនឹងបន្តដល់ឆ្នាំ 2022 នេះ។ ដែលកត្តានេះ អាចនឹងបង្កើនទៅលើតម្លៃនៃការដឹកជញ្ជូន និងតម្លៃនៃការលក់រាយផងដែរ៕