គណនីទម្លាយព័ត៌មានចចាមអារាមល្បីឈ្មោះ ice universe បានបង្ហាញចេញពីទម្រង់នៃការរចនាកញ្ចក់ការពារអេក្រង់ខាងមុខរបស់កំពូលស្មាតហ្វូនជំនាន់ថ្មី Samsung Galaxy S22 និង S22+។ បើតាមរូបភាព Screen Protector ថ្មីនេះបានបង្ហាញឲ្យឃើញថា ទម្រង់អេក្រង់របស់ Galaxy S22 និង S22+ គឺមានកំពស់ខ្ពស់ និងមានគែម bezel-less ជាងជំនាន់ Galaxy S21 និង S21+ ព្រមទាំងមានទទឹងរាងទូលាយជាងមុនបន្តិចផងដែរ។
បើតាមប្រភពព័ត៌មានចចាមអារាមដែលបានចេញផ្សាយក្នុងពេលថ្មីៗកន្លងទៅនេះបាននិយាយថា Samsung នៅតែបន្តប្រើអេក្រង់មានលែនទំលុះថ្ងាសមួយគ្រាប់ជាជាងការប្តូរទៅប្រើបច្ចេកវិទ្យាបង្កប់សែនស័រកាមេរ៉ាក្រោមអេក្រង់នៅលើជំនាន់ Samsung Galaxy S22 Family។ Samsung Galaxy S22 នឹងមានអេក្រង់ទំហំ 6.1 អ៊ីញ, Galaxy S22+ នឹងមានអេក្រង់ទំហំ 6.6 អ៊ីញ និង Galaxy S22 Ultra នឹងមានអេក្រង់ទំហំ 6.8 អ៊ីញ។
និយាយពីប្រព័ន្ធកាមេរ៉ាវិញ Galaxy S22 និង S22+ ត្រូវបានគេដឹងថានឹងបំពាក់មកជាមួយសែនស័រកាមេរ៉ាថ្មីស៊េរី ISOCELL GN5 ទំហំ 50MP Main កម្រិត 1.0µm pixels និងបងធំ Galaxy S22 Ultra នឹងនៅបន្តប្រើសែនស័រទំហំ 108MP Main ដូចជំនាន់ S21 Ultra ដដែល មិនឡើងទៅសែនស័រថ្មី ISOCELL PH1 ទំហំ 200MP នោះទេ។ ចំពោះកំលាំងម៉ាស៊ីនវិញ គឺនឹងបំពាក់នូវកំពូលឈីបជំនាន់ថ្មី Exynos 2200 ប្រើនូវ AMD-GPU រួមនិងបន្ទះឈីបជំនាន់ថ្មី Qualcomm Snapdragon 898។
ហើយបើតាមការបញ្ជាក់នៅលើស្ថាប័ន 3C បានបង្ហាញ Samsung Galaxy S22 Series គឺគាំទ្របច្ចេកវិទ្យាសាកភ្លើងល្បឿនលឿនកំលាំង 25W ដូចមុន។ ប្រភពបន្តថា Galaxy S22 គឺនឹងមានថ្មទំហំ 3,700mAh ខណៈ S22+ នឹងមានថ្មទំហំ 4,500mAh និង S22 Ultra នឹងមានថ្មទំហំ 5,000mAh ដូចជំនាន់មុន ហើយបងធំមួយនេះត្រូវបានគេបញ្ជាក់ថា អាចនឹងមានភ្ជាប់មកជាមួយប៊ិច S-Pen ផ្ទាល់ខ្លួនដូច Galaxy Note Series ថែមទៀតផង៕