ខណៈពេលដែលទីផ្សារស្មាតហ្វូនដែលអាចបត់បានជាច្រើនមានការរីកចម្រើនខ្លាំងកាលពីឆ្នាំមុននេះ ក្រុមហ៊ុនផលិតស្មាតហ្វូនជាច្រើន នៅមិនទាន់បញ្ចេញនូវស្មាតហ្វូន ដែលអាចបត់បានរបស់ខ្លួននៅលើទីផ្សារនៅឡើយទេ។ នៅពេលនេះ មានរបាយការណ៍ថ្មី បានទម្លាយអំពីព័ត៌មានលម្អិតរបស់ស្មាតហ្វូនដែលអាចបត់បានរបស់ក្រុមហ៊ុន OPPO។
តាមការទម្លាយចេញពី Digital Chat Station នៅលើ Weibo បានទម្លាយថា ក្រុមហ៊ុននេះ កំពុងតែធ្វើការនៅលើស្មាតហ្វូនដែលអាចបត់បានរបស់ខ្លួន។ នៅក្នុងការបង្ហោះនៅលើបណ្តាញសង្គម អ្នកទម្លាយនេះ បានបញ្ជាក់ថា ស្មាតហ្វូនដែលអាចបត់បានរបស់ក្រុមហ៊ុនបច្ចេកវិទ្យាយក្សរបស់ចិននេះ គឺមានថាមពលថ្មទំហំ 4,500mAh។ ស្មាតហ្វូននេះ មានបច្ចេកវិទ្យាសាកថ្ម 65W fast charging ផងដែរ។
កាលពីពេលមុននេះ អ្នកទម្លាយនេះ ក៏បង្ហាញព័ត៌មានអំពីស្មាតហ្វូនដែលអាចបត់បានរបស់ក្រុមហ៊ុន OPPO ផងដែរ។ នៅក្នុងខែសីហានេះ Digital Chat Station បានចែករំលែកនូវស្មាតហ្វូនដែលអាចបត់បានដែលមានអេក្រង់ low temperature polycrystalline oxide(LTPO) ផងដែរ។
ស្មាតហ្វូនដែលអាចបត់បាននេះ នឹងប្រើប្រាស់នូវ ColorOS 12 នៅលើ Android 12 ផងដេរ។ អ្នកទម្លាយនេះ នៅមិនទាន់បង្ហាញព័ត៌មានផ្សេងទៀតអំពីស្មាតហ្វូននេះទេ។ ប៉ុន្តែគាត់បញ្ជាក់ថា ស្មាតហ្វូនដែលអាចបត់បានរបស់ក្រុមហ៊ុន OPPO នឹងបង្ហាញខ្លួននៅក្នុងពេលឆាប់ៗនេះ៕
