OnePlus 9RT ប្រកាសចេញលក់ថ្ងៃដំបូងនៅក្នុងទីផ្សារប្រទេសចិន បានចំនួន 26 ពាន់គ្រឿង ដោយប្រើពេលត្រឹមរយះពេល 5 នាទីប៉ុណ្ណោះ

ក្រុមហ៊ុនផលិតស្មាតហ្វូន OnePlus (1+) របស់ប្រទេសចិនបានប្រកាសចេញទូរស័ព្ទជំនាន់ថ្មីស៊េរី OnePlus 9RT កាលពីសប្តាហ៍មុននេះ។ ស្មាតហ្វូនជំនាន់ថ្មីរបស់ក្រុមហ៊ុនមួយបូកនេះបានបំពាក់មកជាមួយកំពូលឈីប Qualcomm Snapdragon 888 និងបានប្រកាសចេញលក់ថ្ងៃដំបូងជាផ្លូវការណ៍នៅទីផ្សារប្រទេសចិន ដោយទទួលបានបរិមាណការលក់មខ្ទង់ច្រើនគួរសម។

យោងទៅលើគណនី Weibo Page ផ្លូវការណ៍របស់ OnePlus បានបញ្ជាក់ថា ស្មាតហ្វូនជំនាន់ថ្មី OnePlus 9RT អាចរកប្រាក់ចំណូលបានចំនួន 100 លានយ័ន្ត ឬប្រហែល 15 លានដុល្លារសម្រាប់ការចេញលក់ថ្ងៃដំបូងក្នុងរយះពេល 5 នាទីនៅក្នុងទីផ្សារប្រទេសចិន។

បរិមាណនៃការលក់ទៅតាមម៉ូដែលផ្សេងគ្នាគឺអាចកើនឡើងចន្លោះពី 26 ពាន់គ្រឿង ទៅ 32 ពាន់គ្រឿង។ OnePlus 9RT ត្រូវបានក្រុមហ៊ុនប្រកាសចេញលក់នៅក្នុងទីផ្សារប្រទេសចិនជាមួយជម្រើសម៉ូដែលផ្សេងៗគ្នា (RAM/Storage) ក្នុងនោះមានម៉ូដែល 8GB/128GB មានតម្លៃខ្ទង់ប្រហែល $515, ម៉ូដែល 8GB/256GB មានតម្លៃខ្ទង់ប្រហែល $545 និងម៉ូដែល 12GB/256GB មានតម្លៃខ្ទង់ប្រហែល $595។ 

OnePlus 9RT គឺជាជំនាន់ថ្មីដែលបានធ្វើការបង្កើនផលិតភាពក្នុងការប្រើប្រាស់ខ្លាំងជាងមុនចេញពីស្រឡាយ OnePlus 9 Series។ ស្មាតហ្វូនជំនាន់ថ្មីនេះទទួលបានការបំពាក់អេក្រង់ AMOLED Display ទំហំ 6.62 អ៊ីញ, ដំឡើងនូវប្រព័ន្ធកាមេរ៉ាក្រោយ 3 គ្រាប់ភ្ជាប់ដោយសែនស័រគោលទំហំ 50MP, មានថ្មទំហំ 4,500mAh គាំទ្របច្ចេកវិទ្យាសាកភ្លើងល្បឿនលឿន Ultra-fast Charge រួមនឹងដំណើរការដោយប្រតិបត្តិការ ColorOS11 នៅលើ Android 11 សម្រាប់ទីផ្សារប្រទេសចិន ដោយឡែកសម្រាប់ទីផ្សារសកលគឺនឹងប្រើនូវ OxygenOS ជំនួសវិញ៕