មួយរយៈចុងក្រោយនេះ ក្រុមហ៊ុន Tecno និង Infinix បានបង្កើនទៅលើកិច្ចខិតខំប្រឹងប្រែងជាច្រើនរបស់ខ្លួនយ៉ាងខ្លាំង។ ហើយរហូតមកដល់ពេលនេះ ក្រុមហ៊ុន Tecno គឺបានបញ្ចេញនូវស្មាតហ្វូនជាច្រើន ដែលភាគច្រើន គឺជាប្រភេទស្មាតហ្វូនលំដាប់ថវិកា និងស្មាតហ្វូនថ្នាក់កណ្តាលទៅកាន់អ្នកប្រើប្រាស់ជាច្រើននៅជុំវិញពិភពលោក។ ស្មាតហ្វូនថ្នាក់កណ្តាលរបស់ក្រុមហ៊ុននេះនាពេលខាងមុខនេះក៏អាចប្រើប្រាស់នូវបច្ចេកវិទ្យា 160W fast-charging ឬច្រើនជាងនេះផងដែរ។
ថ្មីៗនេះ ក្រុមហ៊ុន Tecno ក៏បានសម្រេចចិត្តក្នុងការចំអកទៅលើក្រុមហ៊ុន Samsung ជាមួយនឹងប្រូម៉ូសិន Tecno Phantom X ចុងក្រោយបំផុតរបស់ខ្លួន។ ក្រុមហ៊ុន Samsung គឺគេស្គាល់ថាបានធ្វើការចំអកទៅលើក្រុមហ៊ុនផលិតស្មាតហ្វូនជាច្រើននាពេលកន្លងទៅនេះ។ ជាក់ស្តែង ក្រុមហ៊ុនជាច្រើន ក៏បានធ្វើការចំអកជារឿយៗទៅលើក្រុមហ៊ុនប្រកួតប្រជែងរបស់ខ្លួននៅលើបណ្តាញសង្គម Social Media Channels ផងដែរ។ មុននេះ ក្រុមហ៊ុន Samsung បានចំអកទៅលើក្រុមហ៊ុន Apple ទៅលើរឿង Charging Adapter។
ប៉ុន្មានខែក្រោយការចំអកនេះ ក្រុមហ៊ុន Samsung បានលុបចោលនូវការសើចចំអកនេះ និងសម្រេចចិត្តដើរតាមក្រុមហ៊ុន Apple ក្នុងការដកចេញនូវ Adapter ចេញពីស្មាតហ្វូននេះ។ ក្រុមហ៊ុន Tecno គឺមានការពេញនិយមខ្លាំងក្លាមែនទែនទៅលើការអភិវឌ្ឍស្មាតហ្វូនដែលមានតម្លៃសមរម្យសម្រាប់ទីផ្សារនៅក្នុងប្រទេសកំពុងអភិវឌ្ឍ។ ក្រុមហ៊ុននេះមិនមែនជាដៃគូប្រជែងរបស់ក្រុមហ៊ុនSamsung នោះទេ។
នៅលើ Twitter Account របស់ក្រុមហ៊ុន Tecno គឺបានស្នើទៅអោយអ្នកប្រើប្រាស់របស់ខ្លួនក្នុងការសាកប្រើប្រាស់នូវអ្វីដែលថ្មី ហើយកុំអោយដើរតាមរឿងដដែលរបស់ក្រុមហ៊ុន Samesong។ គេដឹងថា ពាក្យថា Samesong នេះគឺចង់សំដៅទៅលើក្រុមហ៊ុន Samsung។ នេះគឺជាការធ្វើទីផ្សារទៅលើស្មាតហ្វូន Tecno Phantom X ដែលនេះគឺជាការជម្រុញអោយអ្នកប្រើប្រាស់ទិញស្មាតហ្វូនថ្មីដែលមានការឌីស្សាញរូបរាងថ្មី៕