ក្រុមហ៊ុនផលិតស្មាតហ្វូនរបស់ចិនXiaomi ត្រៀមខ្លួនក្នុងការប្រកាសបង្ហាញនូវស្មាតហ្វូន Xiaomi 12 Series ក្នុងពេលឆាប់ៗនេះ។ តាមការបញ្ជាក់នៅក្នុងរបាយការណ៍ជាច្រើនអោយដឹងថា ក្រុមហ៊ុននេះ នឹងបង្ហាញនូវស្មាតហ្វូន Xiaomi 12 នៅក្នុងឆ្នាំនេះ។ តាមការបញ្ជាក់របស់អ្នកទម្លាយ @DCS នៅលើបណ្តាញសង្គម Weibo បានអោយដឹងថា ស្មាតហ្វូន Xiaomi 12 ដែលបំពាក់នូវបន្ទះឈីប Snapdragon 870 នឹងបង្ហាញខ្លួននៅក្នុងខែធ្នូខាងមុខនេះ។
របាយការណ៍ជាច្រើនមុននេះ បានអះអាងថា ស្មាតហ្វូន Xiaomi ដែលមានបន្ទះឈីប Qualcomm Snapdragon 870 SoC គឺជាម៉ូដែល Xiaomi 12X។ ស្មាតហ្វូននេះ នឹងមានអេក្រង់ទំហំ 6.28 អ៊ីង និងមានទទឹង 65.4mm ជាមួយនឹងបណ្តោយ 145.4mm។ ស្មាតហ្វូននេះ ពិតជាងាយស្រួលកាន់នៅក្នុងដៃមែនទែន។
ស្មាតហ្វូននេះ នឹងមានអេក្រង់ AMOLED ជាមួយនឹងកម្រិតភាពច្បាស់ FHD+ 2400x1080pixels។ បន្ថែមពីនេះទៀតនោះ ស្មាតហ្វូននេះនឹងមានអេក្រង់កម្រិត refresh rate ខ្ពស់ក្នុងការប្រើប្រាស់ផងដែរ។ របាយការណ៍ជាច្រើន បានបន្ថែមថា ស្មាតហ្វូននេះនឹងទ្រទ្រង់ទៅលើបច្ចេកវិទ្យា 120Hz refresh rate ផងដែរ។ ដូចនេះ ស្មាតហ្វូន Xiaomi 12 នឹងបង្ហាញខ្លួននៅក្នុងខែក្រោយនេះ ខណៈពេលដែលស្មាតហ្វូន Xiaomi 12X នឹងបង្ហាញខ្លួននៅក្នុងត្រីមាសទី 1 ឆ្នាំ 2022 ខាងមុខនេះ៕
