ក្រុមហ៊ុន Tesla ត្រូវបានគេដឹងថា បានចំនាយទឹកប្រាក់ច្រើនជាង 1 ពាន់លានដុល្លារអាមេរិកក្នុងការសាងសង់រោងចក្រមួយនៅក្នុង Austin។ តាមការបញ្ជាក់របស់ក្រុមហ៊ុននេះ បានបញ្ជាក់ថា ខ្លួនសង្ឃឹមថា ការសាងសង់រោងចក្រនេះនឹងបញ្ចប់នៅចុងឆ្នាំ 2021 នេះ។ ទាក់ទងជាមួយនឹងការសង់រោងចក្រថ្មីរបស់ក្រុមហ៊ុន Tesla នេះ គេបានឃើញឯកសាររជាច្រើន បានដាក់ទៅកាន់នាយកដ្ឋានអាជ្ញាប័ណ្ណ និងនិយតកម្មរដ្ឋតិចសាស់ ដែលផ្តល់ព័ត៌មានអំពីតម្លៃសរុបនៃការវិនិយោគមួយនេះ។
នៅពេលនេះ ក្រុមហ៊ុន Tesla ក៏បានបញ្ចូនឯកសារនេះ ទៅនាយកដ្ឋានអាជ្ញាប័ណ្ណ និងនិយតកម្មរដ្ឋតិចសាស់ (TDLR) ដើម្បីបើកដំនើរការនូវរោងចក្រថ្មីនេះផងដែរ។ នៅក្នុងឯកសារនេះ គឺបានបង្ហាញថា ក្រុមហ៊ុននេះមានគម្រោងក្នុងការបញ្ចប់ការងារទាំងស្រុងនៅថ្ងៃទី 31 ខែធ្នូឆ្នាំ 2021 នេះ។ សម្រាប់រោងចក្រថ្មីនេះ គឺមានទំហំដល់ទៅ 39.94 លានម៉ែត្រការ៉េ។ បន្ថែមពីនេះទៀតនោះ តម្លៃសរុបនៃរោងចក្រនេះ គឺមានដល់ទៅ 1.06 ពាន់លានដុល្លារអាមេរិក។
បើតាមឯកសារនេះ គឺបញ្ជាក់ថា ទីនោះមានការងារជាច្រើន ដូចជា BIW workshop ដែលមានតម្លៃ 182 លានដុល្លារ ការងារ assembly workshop មានតម្លៃ 493 លានដុល្លារ ការងារ painting មានតម្លៃ 126 លានដុល្លារ ការងារ Casting មានតម្លៃ 109 លានដុល្លារ និងការងារ stamping workshop មានតម្លៃ 150 លានដុល្លារ។ រោងចក្រនេះ គឺនឹងធ្វើការផលិតទៅលើរថយន្ត Tesla Model Y, Model 3, Cybertruck និង Semi Trucks នាពេលអនាគតផងដែរ។ ក្រុមហ៊ុន Tesla បានអះអាងថា រោងចក្រថ្មីនេះ នឹងផលិតបានរថយន្ត Model Y យ៉ាងហោចណាស់អោយបានចំនួន 500,000 គ្រឿងជារៀងរាល់ឆ្នាំ។ ក្រុមហ៊ុននេះ ក៏មានរោងចក្រនៅ Fremont, California រោងចក្រនៅស៊ាងហៃ ចិន និងគ្រោងនឹងបង្កើតរោងចក្រមួយទៀតនៅទីក្រុងប៊ែកឡាំង ប្រទេសអាល្លឺម៉ង់ផងដែរ៕