ក្រុមហ៊ុនផលិតបន្ទះឈីបស្មាតហ្វូនឈានមុខគេរបស់តៃវ៉ាន់ Qualcomm ត្រូវបានគេរាយការណ៍ថា ត្រៀមប្រកាសចេញកំពូលឈីបស្មាតហ្វូនជំនាន់ថ្មី Snapdragon 8Gx Gen 1 នៅសប្តាហ៍ក្រោយនេះនៅក្នុងព្រឹត្តិការណ៍ Tech Summit។ ទន្ទឹមនឹងនេះក្រុមហ៊ុនផលិតបន្ទះឈីបស្មាតហ្វូនរួមស្រុក MediaTek ក៏បានប្រកាសចេញកំពូលឈីបស្មាតហ្វូនជំនាន់ថ្មីរបស់ Dimensity 9000 កាលពីសប្តាហ៍មុននេះ ដោយកំពូលឈីបជំនាន់ថ្មីនេះគឺជាឈីបស្មាតហ្វូនដំបូងគេក្នុងលោកដែលផលិតឡើងតាមខ្នាតស្តង់ដារថ្មី 4nm របស់ក្រុមហ៊ុន TSMC។
ជាមួយកំពូលឈីបស្មាតហ្វូនជំនាន់ថ្មីខ្នាត 4nm របស់ MediaTek ត្រូវបានបណ្តាញ Digital Chat Station របស់ប្រទេសចិនបានបង្ហើបឲ្យដឹងថា ក្រុមហ៊ុនអាចនឹងបង្កើនតម្លៃខ្ពស់ជាងជំនាន់មុន ដូចនេះមានន័យថាកំពូលស្មាតហ្វូនដែលត្រូវបំពាក់កំពូលឈីបជំនាន់ថ្មីនេះនឹងមានតម្លៃថ្លៃជាងកំពូលស្មាតហ្វូនដែលបំពាក់ឈីប Dimensity 1200 6nm។ របាយការណ៍ដដែលបានបញ្ជាក់បន្ថែមថា តម្លៃរបស់ Dimensity 9000 4nm អាចនឹងមានតម្លៃខ្ពស់ជាង Dimensity 1200 6nm ដល់ទៅពីរដងឯណោះ។
ជាមួយគ្នានេះ DCS ក៏បានបន្ថែមឲ្យដឹងទៀតថា សម្រាប់បន្ទះឈីបស្មាតហ្វូនថ្នាក់កណ្តាលស៊េរីថ្មី MediaTek Dimensity 7000 5nm អាចនឹងមានវត្តមានប្រើនៅលើស្មាតហ្វូនដែលចេញនៅត្រីមាសដំបូងក្នុងឆ្នាំ 2022 ខណៈស្មាតហ្វូនប្រើកំពូលឈីប Dimensity 9000 4nm អាចនឹងបង្ហាញវត្តមាននៅក្នុងខែកុម្ភៈ ឆ្នាំក្រោយនេះដែរ។
ងាកមកព័ត៌មានទាក់ទងនឹងកំពូលឈីបស្មាតហ្វូនជំនាន់ថ្មីរបស់ Qualcomm ត្រូវបានប្រភពបញ្ជាក់ចុងក្រោយថា គឺមានឈ្មោះថា Snapdragon 8Gx Gen 1 មិនមែន Snapdragon 8 Gen 1 ឬ Snapdragon 898ឡើយ។ ដែលកំពូលឈីបនាគរាជជំនាន់ថ្មីនេះនឹងមកដល់ផ្លូវការណ៍នៅថ្ងៃទី 30 ចុងខែវិច្ឆិកា នាសប្តាហ៍ក្រោយនេះនៅក្នុងព្រឹត្តិការណ៍ Tech Summit។ ហើយ Xiaomi ត្រូវបានគេសន្មត់ថា ជាក្រុមហ៊ុនដំបូងគេដែលប្រើកំពូលឈីបនាគរាជជំនាន់ថ្មីរបស់ Qualcomm ជាមួយវត្តមានកំពូលស្មាតហ្វូនជំនាន់ថ្មីរបស់ខ្លួនគឺ Xiaomi 12 Series។
បើពិតមែននោះមានន័យថា កំពូលស្មាតហ្វូនជំនាន់ថ្មីដែលប្រើកំពូលឈីប 5G Dimensity 9000 4nm របស់ MediaTek គឺមានវត្តមានលើទីផ្សារក្រោយ Snapdragon 8Gx Gen 1 របស់ក្រុមហ៊ុន Qualcomm៕