ថ្មីៗនេះ មានការបង្ហាញចេញនូវប៉ាតង់ថ្មីមួយរបស់ក្រុមហ៊ុន OnePlus ដែលប៉ាតង់ថ្មីនេះ បានបង្ហាញតម្រុយថាក្រុមហ៊ុនបច្ចេកវិទ្យាស្មាតហ្វូនរបស់ប្រទេសចិនមួយនេះបាននឹងកំពុងសង្ងំធ្វើការអភិវឌ្ឍន៍ផលិតស្មាតហ្វូនអេក្រង់បត់បានបីកំនត់ដោយប្រើប្រាស់នូវគន្លឹះត្រចៀកបត់ចំនួនពីរ និងមានប៊ូតុង Sliding សម្រាប់ចាក់សោរការកាច់បត់ថែមទៀតផង។
ជាមួយប៉ាតង់ថ្មីស្តីពីស្មាតហ្វូនអេក្រង់បត់បីតង់ (Tree-Foldable Display) នេះ បានសបញ្ជាក់ឲ្យឃើញថា OnePlus បានត្រៀមខ្លួនរួចរាល់ក្នុងការចូលប្រឡូកក្នុងទីផ្សារស្មាតហ្វូនអេក្រង់បត់ក្នុងពេលដ៏ខ្លីខាងមុននេះ។ ក្នុងពេលបច្ចុប្បន្នក្រុមហ៊ុនផលិតស្មាតហ្វូនដែលកំពុងឈានមុខគេក្នុងទីផ្សារស្មាតហ្វូនអេក្រង់បត់ ឬ Foldable Smartphone គឺទីមួយ Samsung, ទីពីរ Huawei និងទីបីគឺ Xiaomi ខណៈដែលក្រុមហ៊ុនបច្ចេកវិទ្យាស្មាតហ្វូនល្បីៗជាច្រើនទៀតបានប្រកាសត្រៀមខ្លួនចូលប្រឡូកក្នុងឧស្សាហកម្មស្មាតហ្វូនដ៏ស្មុគស្មាញមួយនេះផងដែរ។
សម្រាប់ប៉ាតង់ស្មាតហ្វូនអេក្រង់បត់បានបីតង់របស់ OnePlus ត្រូវបានបង្កើតគំរូឡើងដោយលោក Goa Yang ដែលលោកបានដាក់ចំណងជើងប៉ាតង់នេះថា “Mobile Terminal”។ ជាមួយប៉ាតង់ស្មាតហ្វូនអេក្រង់បត់នេះត្រូវបានគេដឹងថា OnePlus បានដាក់ពាក្យស្នើរសុំកម្មសិទ្ធិបញ្ញាទៅកាន់ស្ថាប័នពាក់ព័ន្ធនៅក្នុងប្រទេសចិនតាំងពីអំឡុងឆ្នាំ 2020 មកម៉្លេះ និងបានដាក់បង្ហាញចេញផ្លូវការណ៍កាលពីអំឡុងខែកក្តដាឆ្នាំ 2021 នេះ។ ហើយក្នុងពេលនេះ OnePlus ក៏បានដាក់ពាក្យស្នើសុំកម្មសិទ្ធិបញ្ញាទៅកាន់ស្ថាប័ន ការិយាល័យកម្មសិទ្ធិបញ្ញាពិភពលោក ដែលហៅកាត់ថា WIPO ហើយស្ថាប័នសំខាន់មួយនេះក៏បានបោះត្រាយល់ព្រម និងផ្តល់នូវកម្មសិទ្ធិបញ្ញាផ្លូវការណ៍ដល់ OnePlus សម្រាប់ការរចនានូវបច្ចេកវិទ្យាស្មាតហ្វូនអេក្រង់បត់បែបនេះហើយដែរ។
បើតាមរូបគំរូព្រៀងរបស់ OnePlus Tri-Fold Smartphone បានបង្ហាញថា ស្មាតហ្វូនអេក្រង់បត់បីតង់នេះគឺមានរបៀបក្នុងការកាច់បត់បីរបៀបផ្សេងគ្នាដើម្បីផ្តល់ឲ្យការប្រើកម្មវិធីស្របតាមផ្នែកនិមួយៗរបស់អេក្រង់ ហើយនៅពេលពន្លាអេក្រង់ទាំង 3 តង់របស់វា ស្មាតហ្វូននេះនឹងប្តូរក្លាយជាឧបករណ៍ Tablet ដែលមានអេក្រង់ធំមួយសម្រាប់ការកម្សាន្ត។ ទោះជាយ៉ាងណាគេមិនទាន់ដឹងពីទំហំអេក្រង់របស់ស្មាតហ្វូន OnePlus Tri-Fold Smartphone រួមនិងគុណសម្បត្តិដែលនឹងមាននៅលើស្មាតហ្វូនថ្មីនេះនោះទេ ក៏ដូចជាកាលបរិច្ឆេទដែល OnePlus ត្រូវបង្ហាញចេញស្មាតហ្វូនអេក្រង់បត់នេះផងដែរ ប៉ុន្តែ បើតាមការព្យាករណ៍ OnePlus Tri-Fold Smartphone អាចនឹងបង្ហាញវត្តមានក្នុងខែណាមួយនៅឆ្នាំ 2022 ខាងមុខ៕
