រថយន្តអគ្គិសនីម៉ូដែលថ្មីរបស់ក្រុមហ៊ុន Kia ម៉ូដែល EV9 ដែលជាប្រភេទរថយន្តអគ្គិសនី SUV កំពុងទទួលបានការចាប់អារម្មខ្លាំងនៅក្នុងទីផ្សាររថយន្ត។ រថយន្តអគ្គិសនីម៉ូដែលថ្មីនេះ មានការរចនារូបរាងឡើងបែបប្រណិតទំនើបទាន់សម័យ។
រថយន្តអគ្គិសនី SUV ស៊េរីថ្មីនេះបានបំពាក់នូវម៉ូទ័រអគ្គិសនីមួយដែលមានកំលាំង 200hp។ ជាការពិតណាស់ Kia EV9 អាចនឹងប្រើម៉ូទ័រដែលបានប្រើនៅលើ Kia EV6 LR ដែលមានកំលាំង 228hp។ ចំពោះរថយន្តអគ្គិសនី Kia EV9 ដែលមានតម្លៃធូរថ្លៃបំផុត គឺអាចចាប់ពីខ្ទង់ $56,000 ហើយវាអាចបើកបរបានចំងាយផ្លូវបានដល់ 220 ម៉ាយល៍។ ចំពោះ EV9 ម៉ូដែលផ្សេងមួយទៀតដែលប្រើម៉ូទ័រដូចគ្នា ប៉ុន្តែ ប្រើប្រាស់ថ្មធំជាងដែលមានទំហំ 82.5kWh ដែលថ្មនេះត្រូវបាន Kia, Hyundai និង Genesis បានប្រើនៅលើរថយន្តអគ្គិសនីរបស់ពួកគេរួចហើយ។ ដោយថាមពលថ្មនេះ គឺសាកពេញម្តងអាចរត់បានចំងាយផ្លូវដល់ 290 ម៉ាយល៍។
ដោយឡែក Kia ក៏បានផ្តល់នូវជម្រើស EV9 ស៊េរីខ្ពស់មួយទៀតដែលប្រើនូវម៉ូទ័រអគ្គិសនីចំនួនពីរ (Dual-Motor) ដែលផ្តល់នូវកំលាំង 400hp AWD និងបំពាក់អាគុយអគ្គិសនីកំលាំង 82.5kWh។ យ៉ាងណាមិញ ម៉ូដែលខ្ពស់នេះអាចរត់បានចំងាយផ្លូវពី 240 ទៅ 260 ម៉ាយល៍។ ហើយម៉ូដែលនេះ អាចផ្តល់នូវកំលាំងរង្វិល 480lb-ft ឬ 650Nm។ ចំពោះរថយន្តអគ្គិសនីខ្លួនធំ SUV របស់ Kia មួយនេះអាចជាន់វ៉ាត់ទ្រនិចកុងទ័រពី 0 ទៅ 60mph ចាយពេលខ្ទង់ 5.2 វិនាទី។ Kia EV9 នឹងក្លាយជារថយន្តអគ្គិសនី SUV ដំបូងគេចេញពីសម្ព័ន្ធក្រុមហ៊ុននេះ ដែលនឹងតាមពីក្រោយដោយ Hyundai Loniq 7 និង Genesis។ ទោះជាយ៉ាងណាក្រុមហ៊ុន Kia មិនទាន់បានបញ្ជាក់ពីកាលបរិច្ឆេទក្នុងការចេញលក់រថយន្តអគ្គិសនីស៊េរីថ្មីនេះនោះទេ៕