ក្រុមហ៊ុន Infinix ត្រៀមប្រកាសចេញផលិតផលថ្មីរបស់ខ្លួនចំនួនពីរបន្ថែមទៀតនៅក្នុងប្រទេសឥណ្ឌានាថ្ងៃទី 31 ខែមករា ខាងមុខនេះបន្ទាប់ពីការប្រកាសចេញលក់ស្មាតហ្វូនលំដាប់ថវិកាស៊េរីថ្មី Infinix Note 12i នៅថ្ងៃទីនេះ។ សម្រាប់ផលិតផលថ្មីបន្ទាប់ទាំងពីរដែលនឹងមកដល់នៅចុងខែនេះ គឺមាន Infinix Zero Book ដែលជាកុំព្យូទ័រស៊េរីថ្មី និងស្មាតហ្វូនស៊េរីថ្មី Infinix Zero 5G 2023 ដែលនឹងមកដល់នៅថ្ងៃទី 04 ខែកុម្ភៈ។
ក្រុមហ៊ុន Infinix បានចូលប្រឡូកក្នុងទីផ្សារកុំព្យូទ័រយួរដៃកាលពីអំឡុងខែធ្នូឆ្នាំ 2021 ដោយប្រកាសចេញ Laptop ដំបូងរបស់ខ្លួនម៉ូដែល Infinix INBook X1។ ហើយនៅក្នុងឆ្នាំ 2022 ក្រុមហ៊ុននេះក៏បានប្រកាសចេញ Laptop ស៊េរីថ្មីចំនួន 3 ស៊េរីទៀត ដែលមានម៉ូដែល Infinix INBook X1 Slim, INBook X1 Neo និង INBook X2 Plus។ ហើយនៅក្នុងឆ្នាំ 2023 នេះ Infinix ក៏ត្រៀមប្រកាសចេញ Laptop ស៊េរីថ្មីក្រោមម៉ាកសញ្ញា Zero ដែលនឹងមានឈ្មោះដូចជា Zero Book និង Zero Book Ultra។
កុំព្យូទ័រ Laptop ស៊េរីថ្មីនេះនឹងមានតម្លៃថ្លៃជាងស៊េរីមុនៗដែលបានចេញលក់នៅក្នុងទីផ្សារប្រទេសឥណ្ឌា។ Infinix Zero Book Series នឹងមានមកជាមួយអង្គគណនា 12th Gen Intel-Core H Processor ដែលមានជម្រើសម៉ាស៊ីន Core i5, Core i7 និង Core i9។ កុំព្យូទ័រស៊េរីថ្មីនេះ ក៏នឹងប្រើរ៉េមប្រភេទ LPDDR5 និង PCIe 4.0 SSD។ Infinix Zero Book Series ជំនាន់ដំបូងនឹងមកជាមួយជម្រើស Core i5 និង Core i7 ដែលនឹងមានភ្ជាប់ដោយរ៉េមទំហំ 16GB និងថាសរឹងទំហំ 512GB ហើយសម្រាប់ម៉ូដែល Core i9 នឹងមានភ្ជាប់ដោយរ៉េមទំហំ 32GB ជាមួយថាសរឹងទំហំ 1TB។
សម្រាប់ម៉ូដែលខ្ពស់បំផុត គឺ Infinix Zero Book Ultra ដែលជា Top Level នឹងមានតម្លៃខ្ទង់ប្រហែល $1,100 ដែលជាតម្លៃធូរថ្លៃជាងម៉ាកផ្សេងដែលមានការបំពាក់គុណសម្បត្តិដូចគ្នានេះ ដែលម៉ូដែលខ្លះអាចមានតម្លៃរហូតដល់ទៅខ្ទង់ប្រហែល $1,837 នៅទីផ្សារប្រទេសឥណ្ឌា។ Infinix Zero Book Series នឹងមានអេក្រង់ទំហំ 15.6 អ៊ីញ កម្រិត FHD-LED Backlit Display, មានកាមេរ៉ា Webcam កម្រិត FHD ភ្ជាប់ជាមួយបច្ចេកវិទ្យា AI BeautyCam, ប្រព័ន្ធបំពងសំឡេង quad-array speaker, មានថ្មទំហំ 70Whr និងគាំទ្របច្ចេកវិទ្យាសាកភ្លើងកំលាំង 96W៕