នៅពេលនេះ បន្ទះឈីប Kirin ជាថ្មីម្តងទៀត បានស្ថិតនៅក្នុងកិច្ចពិភាក្សានៅក្នុងចំណោមអ្នកប្រើប្រាស់ស្មាតហ្វូន Huawei ជាច្រើន និងសមាគមន៍ជាច្រើននៅលើអ៊ីនធឺណិត ហើយថ្មីៗនេះ អ្នកគាំទ្រជាច្រើនក៏បញ្ជាក់អំពីឈ្មោះនៃបន្ទះឈីបថ្មី flagship Kirin នេះផងដែរ។ អ្នកទម្លាយម្នាក់នៅលើ Weibo បានបង្ហោះថា បន្ទះឈីប Huawei Kirin flagship នេះនឹងមិនមានឈ្មោះហៅថា Kirin 9 series នោះទេដូចជា 9000 ប្រសិនបើវាពិតជាមានវត្តមាននៅលើទីផ្សារពិតមែន។
អ្នកទម្លាយរូបនេះ បានបញ្ជាក់ថា បន្ទះឈីបនេះ អាចនឹងមានឈ្មោះហៅថា Kirin K9 Gen 1 នេះ ដែលឈីបនេះ គឺមានការជម្រុញពីឈ្មោះ Qualcomm Snapdragon 8 Gen 1។ អ្នកខ្លះទៀត បាននិយាយថា ឈីបអាចនឹងមានឈ្មោះហៅថា K9V1, k9v2, Kirin 10, Kirin 9999 និងច្រើនទៀត។ វាពិតជារឿងល្អដែលមនុស្សជាច្រើនចាប់ផ្តើមមានការរំភើបជាមួយនឹងរឿងនេះ។ យ៉ាងណាមិញ ក្រុមហ៊ុន Huawei នៅតែបន្តក្នុងការបន្តអភិវឌ្ឍ និងរចនាទៅលើបន្ទះឈីបរបស់ខ្លួនជាពិសេសទៅលើក្រុមហ៊ុនបុត្រសម្ព័ន្ធ HiSilicon ជាដើម។
នៅក្នុងរូបភាព Screenshot មួយបង្ហាញអំពីបន្ទះឈីប Flagship Kirin Chipset “KC10” ដែលធ្វើតេស្តនៅលើស្មាតហ្វូន Huawei Mate 50 Pro។ បន្ទះឈីបនេះ គឺប្រើប្រាស់នៅក្នុងគោលដៅនៃការតេស្តប៉ុណ្ណោះ ហើយវាក៏មានការទម្លាយថា ក្រុមហ៊ុននេះ នឹងប្រើប្រាស់នូវបន្ទះឈីបនេះសម្រាប់ផ្ទៃក្នុងប៉ុណ្នោះ។ បើមើលទៅលើស្មាតហ្វូន Huawei Mate 50 Pro ក៏ប្រើប្រាស់នូវបន្ទះឈីប Qualcomm Snapdragon 8+ Gen 1។ យ៉ាងណាមិញ មិនមានម៉ូដែលណាមួយរបស់ក្រុមហ៊ុននេះ ដែលប្រើប្រាស់នូវបន្ទះឈីប Kirin KC10 នោះទេ។
សូមជំរាបថា ថ្មីៗនេះ ក្រុមហ៊ុន HiSilicon ក៏ត្រូវបានហាមប្រាមពីការព្រីននូវបន្ទះឈីបថ្មីចេញពីក្រុមហ៊ុន TSMC និងក្រុមហ៊ុនផលិតបន្ទះឈីបជាច្រើនទៀតផងដែរ ប៉ុន្តែក្រុមហ៊ុននេះ គឺមិនមានបញ្ហានោះទេ នៅក្នុងការស្រាវជ្រាវទៅលើការឌីស្សាញបន្ទះឈីបថ្មីនោះ៕
